GINATOS ka mga estudyante ang midagsa alang sa eksaminasyon ug screening aron mahimong DavNor Scholars.
Sa ikaupat ug katapusang hugna sa Provincial Scholarship Program Screening and Selection nga gipahinabo kagahapon sulod sa DavNor Training Center, naglinya ang sobra 60 ka mga estudyante nga pulos malaumon nga makapasar sa eksaminasyon ug interbyu bisan kun 15 lamang ang kuhaon. Ang matag 11 ka LGU sa probinsya adunay 15 ka mga indibiduwal nga mahimong probinsyal scholars nga mahimong magtungha sa bisan unsang vocational o kaha technical nga kurso sa bisan asa nga eskuylahan sa Davao del Norte karong tig-abli sa klase.
Human gayod sa eleksyon, gipahinabo ang unang scholarship screening didto sa Carmen niadtong Mayo 10 nga gisundan didto sa Kapalong pagka Mayo 11 ug IGACOS niadtong Mayo 12 diin susama sa gipahitabo sa Training Center, daghan ang gustong mahimong scholar nga modawat ug P15,000 nga allowance matag semester.
Wala usab pasagdi ang mga sakop sa Indigenous People ug giseguro nga sila apil sa mamahimong probinsyal scholar nga matod ni Ms. Gloria Excelsa Pamugas, ang hepe sa DavNor Livelihood Manpower Management Division, gihatagan ug prayoridad sa ilang LGU.
Gawas sa libreng pagtungha, dugang saysay ni Ms. Gloria Excelsa Pamugas pinaagi sa telepono, nga ang probinsyal nga administrasyon ni Gobernador Rodolfo del Rosario mihimo sab ug kahikayan nga matabangan ang mga makahuman nga probinsyal scholars alang sa panarbaho. Ang buhatan sa probinsyal Davao del Norte Public Employment Service Office (DavNor PESO) daghan na ang natabangan nga makakita ug trabaho dili lang sa lokal apil na sa abroad.
Sa 2016 nga tuig lamang, 141 ka estudyante gikan sa nagkalain-laing unibersidad ug eskwelahan nakatrabaho ubos sa programa sa Davao del Norte Special Public Employment Service Office sulod sa 20 ka mga adlaw. Ang trabahante-estudyante ubos sa SPES nga programa, midawat sa minimum wage nga P317 ang adlaw diin ang 60% niini (P190.20) bayaran sa probinsya ug ang 40% (P126.80) ang Department of Labor and Employment kun DOLE ang moabaga.
Gawas sa sweldo, ang 141 ka mga SPES grantees gipailawom usab sa usa ka Perfume Making seminar nga mahimong kakuhaan usab ug dugang kita.
Niining pagsulat wala pa matino ang 165 nga mipasar ug makatungha ingong probinsyal scholars sa Davao del Norte. (pioDavNor)
