GIDAGSA sa nagkadaiyang talento ang audition sa DavNor Sikat didto sa Tagum City Pavillion, Lunes, Abril 30, 2018.

Kini na ang ika-10 nga pag-audition niadtong adunay talento sa solo nga pagkanta, duet, sayaw, pagtugtog ug instrumento, aerial silk dancing, beatboxer, modelling ug uban pa alang sa mga batan-on nga nag-edad 13-21 anyos. 

Ang grupo sa mga estudyante nga Tuazon Dance Society nagpakita sa ilang talento pinaagi sa interpretative dance nga nagpraktis sulod lamang sa tulo ka adlaw.  

“Just 3 days . . Grade 10, then Grade 8, Grade 7, Senior High, para ma-share namo among talent sa daghan,” matod sa grupo sa mga estudyante sa Tuazon National High School sa Madaum, Tagum City.

Ang duha ka grupo sa taga University of Mindanao Tagum College nagsanib-pwersa nga miabot ug 25 ka miembro ug nagtawag sa ilang bag-ong grupo nga “Desamiz.”

“Actually duha mi ka grupo naa dira. . We merged our group for this event,” matod ni Ms. “M,” ang nag-inusarang babae nga miembro sa Desamiz dance group.

Human dayon sa audition, ang DavNor Sikat mopili ug tag-tulo ka mga contestants gikan sa 11 ka Local Government Units sa Davao del Norte ingong mga quarterfinalists nga dihadiha modawat ug tig-lima ka libo ka pesos.

Dayon ang tanang quarterfinalists magtigi kini alang sa top 10 nga mopadayon ingong finalists nga pagahimoon sa ika-51 Araw ng Davao del Norte. Ang mahimong DavNor Sikat champion modawat ug 50,000.00 pesos.

Unang giabot sa DavNor Sikat ang Braulio E. Dujali, dayon Panabo City, Carmen, New Corella, Kapalong, Sto. Tomas, Talaingod, Asuncion, San Isidro, Tagum City ug dayon Island Garden City of Samal (IGACOS) karong Myerkoles, Mayo 2, 2018. 


 

More Davnor Updates at

DavNor Karon