PAGPATAAS KOLEKSYON SA BUHIS: CARP beneficiaries forum gipahigayon

SA TUYO nga mapataas pa ang koleksyon sa buhis, nagpahigayon ang Davao del Norte Provincial Treasurer’s Office (PTO) ug panagtigom alang sa mga Comprehensive Land Reform Beneficiaries (CARP) gikan sa lungsod sa New Corella, Martes, Mayo 8.

“Dire sa probinsya, duha ka dagkong resources ang mosulod. Kanang gitawag nato nga Internal Revenue Allotment, share nato sa national government, ug kanang Real Property Tax, kanang ginabayran nato nga buhis. Mao pod na’y atong gamiton aron sa pagpadagan sa mga programa, mga proyekto ug mga kalihokan sa pangagamhanan. I hope inyo kung nasabtan sa ka-importante niini. . nga maliwanagan mo,” pasabot ni probinsyal administrador Samson Sanchez ngadto sa sobra 220 ka partisipante nga uban sa pagpanag-iya ug yuta, duna sab kini kaubang responsibilidad sa pagbayad ug buhis.  

Gidala gayod sa PTO ang mga personahe sa Land Bank, DAR, Atty John Paul Devilleres sa DavNor Registry of Deeds aron magpasabot sa mga mag-uuma kauban ang DavNor Provincial Legal Officer, PASSO, New Corella MTO, MASSO ug MARO.

“Tungod ni sa mga issues and concerns sa mga beneficiaries. . . ang atong mga guest speakers gikan sa Land Bank, Department of Agrarian Reform, gikan sa ROD. Kini free of charge. Ma-shoot na nila ang mga questions nga ilahang gibinbin sa dugay nang panahon especially kining CARP program,” pahayag ni Ms. Regina Ricafort, ang provincial treasurer, labot sa katuyoan sa forum.

Gipasabot sa PTO department head nga ang problema sa mga CARP beneficiaries nakadugang sa wala makolekta nga mga buhis.

“Isa ni sa mga uncollected taxes tungod lagi kay naa sila’y mga problema sa ilahang titulo. Kanang collective (title) wala pa’y technical description, so hesitant sila mobayad. Dili lang ni siya sa Davao del Norte. Davao Region ug all over the Philippines mao gyod ni among problema sa atong mga CARP beneficiaries,” pasabot sa DavNor provincial treasurer.

Unang gi-imbita ang mga CARP beneficiaries gikan sa lungsod sa New Corella. Kahinumduman nga sa miaging tuig, 11 gayod ka mga parsela sa yuta sa maong lungsod ang na-public auction tungod sa wala pagbayad sa mehorasan. Gipaneguro hinuon ni Ricafort nga duna pa’y mosunod nga mga forum sa mga CARP beneficiaries uban ang positibong pagdahom nga motaas pa ang ilang koleksyon tungod sa Awareness campaign.

Ilawom sa BEST PEOPLE development agenda sa administrasyong Gobernador Anthony del Rosario,  katuyoan niini nga padayong mahatod ang pinaka-maayong serbisyo ngadto sa tanang Dabaonon pinaagi sa pagbalik sa buhis nga ilang gibayad sa gobyerno.


 

More Davnor Updates at

DavNor Karon

 

DavNor News