SA TUMONG nga mapataas ang ani, padayong gibansay sa panggamhanan sa Davao del Norte pinaagi sa Provincial Agriculture Office (PAGRO) ang mga “inbred” certified rice seed growers gikan Mayo 7-11, 2018.

Sa iyang mensahe, gipaabot ni Gobernador Anthony del Rosario ang iyang pagdasig sa mga mag-uuma sa humay nga ipataas ang katakos ug kahibalo sa panguma uban ang pagsalig nga makab-ot ang taas nga produksyon.  

“As an agricultural province, we are blessed with the climate and soil that is ideal for tilling our land inorder to grow high value crops. With this advantage and by heightening the skills and knowledge of our famers we will be able to have a higher yield. . Dili nato gusto nga maabot ta sa punto nga magsalig ta sa uban para ma sustenir ang panginahanglan sa atong katawhan. Dako ang among pagsalig nga kaya nato mahimong 100% self-sufficient sa bugas,” matod sa mensahe ni Gob AGR nga gipahayag ni Engelbert Eugenio.

Ang maong pagbansay gikinahanglan sab sa mga membro sa Davao Multi-Purpose Seed Producers Cooperative (DAMSEPCO) ug North Davao Seed Producers Association (NDPAS) aron ma-renew ang “certification” isip rice seed growers, makanunot sa bag-ong pamaagi ug masinati sa bag-ong migawas “variety” sa humay.

Matod ni DavNor PAGRO OIC-Chief Crop Production Management Division Edgardo Ado nga duha ka grupo ang mipailawom sa training aron mahatagan ug certification ang mga inbred rice seed growers.

“Duha ni ka grupo. Naay mga bag-o ug kadtong na-expire na ang ilang accreditation, mao ni as basis for renewal. . . Ang bag-o nag-start mi adtong Lunes, karon gi-fuse na ang bag-o ug daan. Parehas lang gihapon sila ug number of years nga accreditation, three years,” matod ni Ado sa training kagahapon, Mayo 9 didto sa PAGRO Training Hall.

Gawas nga kinahanglanon sa renewal, matod ni Emma Monteverde, 8 ka tuig na nga inbred rice seed grower ug sakop sa DAMSEPCO nga aron usab ma-update sa mga kabag-ohan.

“Every year naay mga new varieties sa humay nga gina-introduce sa Department of Agriculture . . kay naay mga seeds nga dili na siya suited sa locality, kung naay mga new varieties for trial amoa pod na silang gisulayan para mabal-an ang number of yields every harvest, eating quality, suitable variety para sa among area ilabina pod ang milling recovery,” matod ni Monteverde.

Bisan sa padayong pagbansay labot sa inbred nga variety, gidasig sa PAGRO ug PhilRice nga sagopon sa mga mag-uuma ang napamatud-an taas nga ani sa hybrid gikan 15% pataas kumpara sa inbred.

“Ang mga farmers nato nakabalo na about hybrid. Pero ang ilang acceptable, ilahang mind-set, dugay na man gud sila nagtanom ug inbred. . Pero kung ato lang gyod hatagan ug panahon, dako gyod ni siya ug tabang sa atong rice production. . Atong mga farmers naa sa ilang hunahuna gusto mag-hybrid. Pero ang hybrid medyo mahal-mahal kumpara sa inbred. Pero in terms of production, bisag asa lamang ang hybrid. We’ll go to hybridization kay kana ra gyod ang sulbad nga makahabol ta sa panginahanglan sa bugas,” esplikar ni OIC-Chief Crop Production Management Division Ado.

“Minahal namong mag-uuma naa gyod sa inyong kamot ang dakong tabang para makab-ot nato ang rice self-sufficiency. Usa sa pamaagi ang paggamit ug hybrid nga binhi. . hangyo namo sa inyoha nga testingan lang ninyo,” matod sab ni rice technologist Hilario Yunson, Jr. gikan sa Philrice.


 

More Davnor Updates at

DavNor Karon

 

DavNor News