HANGTOD ning pagsulat walay nakitang Permit to Campaign (PTC) o Permit to Win (PTW) nga kalihokan ang Philippine Army labot sa taliabot nga Barangay ug Sangguniang Kabataaan nga eleksyon karong Mayo 14 sulod sa probinsya sa Davao del Norte.
Kini ang gibutyag ni Capt Jerry Lamosao, spokesperson sa 10ID (Agila) nga nakabase sa Tuburan, Mawab, ComVal Province ug ni Major Russel Bumanlag Executive Officer sa 56IB nga anaa nahimutang sa lungsod sa Talaingod atol sa Kapihan sa Kapitolyo kagahapon, Huwebes, Mayo 10.
Ang bag-ong 56IB nga gikan pa gayod sa Aurora Province miabot sa Talaingod niadtong Enero ug Marso ug nakatutok lamang sa tibuok ginsakpan sa munisipyo tungod sa hulga sa rebeldeng NPA.
“Yung area namin sa Talaingod hotspot talaga yan base sa COMELEC. . Yung presence kasi ng NPA doon sa area. Pero . . i-assure namin na. . at least fair yung elections, na wala yung vote-buying. . Ginawan na namin ng plano sa security para mapre-empt yung mga situations na ganun,” matod ni Major Russel Bumanlag nga nagpasabot nga ang Talaingod anaa sa Election Watchlist Areas (EWAs) Category 2 tungod sa presensya sa mga NPA ug dili sa pribado armadong grupo.
Gipahayag sab sa tigpamaba sa 10th Infantry Division nga bisan sa ilang katibuk-an nga Area of Responsibility (AOR) wala sab angay kahadlokan ang mga residente ug bisan ang mga politiko.
“Talaingod is just one part of the 251 identifed election watchlist areas. . Kining 251 election watchlist areas mao ni ang gina-validate kauban ang PNP ug COMELEC ug AFP. Mao ni atong gina-bantayan. . Pero dili lang ta mabalaka,” matod ni Capt Lamosao nga nagklaro nga ang nahitabong mga engkwentro nakahatag hinuon ug kahigayonan sa ubang membro sa NPA nga makabulag sa ilang grupo ug mosurender.
Apan gihatagan ug dakong rason ni Capt Lamosao ang padayong Community Support Program (CSP) sa kagamhanan nga gipaabot ilabina sa hilit kaayong lugar pinaagi sa Philippine Army.
“Sa tinuod lang daghan nang mga membro sa NPA gusto nang monaug tungod nakita nila ang sinseridad sa atong gobyerno. Kadtong mga nag-surender nga nakadawat na ug financial support naghimo na sa ilang livelihood, nalipay sila ug gusto pod nila nga ma-experience,” padayong pasabot ni Capt Lamosao.
Ang Comprehensive Integration Program (CLIP) maoy usa sa daghang programa alang sa mga NPA nga mibalik sa gobyerno ug hugot gisuportahan sa probinsyal nga panggamhanan sa Davao del Norte nga miani ug positibong resulta. Niadtong Mayo 4 lang nga Provincial Peace and Order Council meeting, 7 ka mga NPA surrenderees ang nakadawat ug hinabang gikan sa DILG ug Davao del Norte.
