NAKAHUMAN na sa 20 ka adlaw nga trabaho ang 205 ka mga estudyante ilawom sa Special Program for Employment of Students (SPES) nga naasayn sa lain-laing departamento sa DavNor Kapitolyo.

Sa Culmination program kagahapon, Martes, Hunyo 5, pasabot ni Employment Workforce Development Division head Ms. Gloria Pamugas nga ang probinsyal nga ang administrasyon ni Gobernador Anthony del Rosario padayon nga nagsuporta sa naglisod nga mga estudyante

Ilawom sa SPES program, ang mga estudyante-trabahante modawat ug 60% sa P453/matag adlaw nga suhol samtang ang 40% bayran sa Department of Labor and Employment (DOLE).

“Naa ta’y 205 ka mga SPES grantees. . . Kagahapon pa nila gi-submit ang ilang mga documents, gi- check pa sa office then i-process nato na tomorrow,” pagbutyag ni Ms. Pamugas labot sa dawaton nga sweldo sa mga SPES grantees.

Dugang gipahibalo sa EWD division head nga sa sunod tuig, mahimong motaas pa ang suhol sa mga SPES grantees tungod sa bag-ong kamandoan sa DOLE.

“Naghandom gyod ta nga mapataasan pa ang budget next year kay dunay direktiba ang Department of Labor and Employment nga next year dapat ilang sweldo mahimo nang 503 compared karon nga 453 per day,” dugang pagbutyag ni Ms. Pamugas.

Ang SPES grantee nga si Erika Aroedjao nga na-asayn sa PaDO EWDD mapasalamaton kaayo sa iyang nakat-onan.

“Daghan kaayo ko ug natun-an kay bukod sa panahi gitudloan pod mi pagbuhat sa bouquet,” matod ni Erika nga wala mahibalo nga ang iyang gitahi nga gown ug bouquet mao ang gisul-ob ug gibitbit sa mga magtiayon atol sa Kasalan ng Bayan sa BEST PEOPLE Caravan of Services. 

Mapasalamaton sab si SPES grantee John Ralph Antonio gikan sa UM Tagum tungod sa iyang nakat-onan dihang naasayn sa Provincial Engineering Office.

“Kaning SPES nga opportunity dili lang para makaipon ug kwarta kundili experience. At the same time preparation ni sa akong future career kay nangandoy pod ko nga maging engineer. Kailangan nako nga makatuon, naa na ko’y knowledge, background unsay trabahoon,” matod ni JR.

Gidayeg sa batan-ong SPES grantee ang suporta ni Gobernador Anthony del Rosario sa SPES nga programa.

“The best. Syempre taga DavNor gud na si Gob, the best,” pagdayeg ni JR.

Apan sa mensahe ni Gobernador Anthony del Rosario, gipasabot ni Mr. Nemeses Nuñez ang buot ipasabot sa “The Best.”

“Ang buot ipasabot sa “The Best” is: In everything do, we have to strive for the best. Ato gyod buhaton ang pinaka the best. Kamong mga kabatan-onan, katawhan sa Davao del Norte, sa tanan natong buhaton, ato gyong buhaton ang pinaka the best,” pasabot ni Mr. Nuñez labot sa klase sa serbisyo nga angay ihatod ngadto sa publiko.


 

More Davnor Updates at

DavNor Karon

 

DavNor News