WALA sila sa dagat o suba, apan dili lang kay gihatagan ug isda, gitudloan pa gyod ang taga Carmen nga makamao mangisda atol sa ikaduhang adlaw BEST PEOPLE Public Service Caravan, Martes Hunyo 12.

Usa sa mapinadayonong programa dala sa BEST PEOPLE Public Service Caravan mao ang mga pagbansay (trainings) labina ang mga kababayen-an sama sa paghimo ug bridal bouquets, corsages, paghimo ug mga kagamitan gikan sa recycled nga mga butang ug herbal oil making.

“Maghimo ta’g bulak tapos himoon na pod na siyang bouquet. Yellow gold atong gamiton, golden yellow kay ika-50 ka tuig sa Carmen,”matod sa Employment Workforce Development Division (EWDD) trainor Juanita Ulay ngadto sa sobra 25 ka mga partisipante nga mga nanay nga sa unang higayon matudloan paghimo ug bulak nga rosas aron himoon sab nga bouquet.

Ang mahimong produkto gamiton sa 175 ka magtiayon kaslonon karong Byernes, Hunyo 15 Kasalan ng Bayan.

“Mas ganahan pa gyod kung moabot mo ug tulo ka adlaw kay naa mo’y sertipiko nga madawat bahin ana. Kay magamit baya pod ninyo. Kinsa tong gusto mag-abroad-abroad, unya dugangan pa gyod ug laing skills ninyo, so okay kaayo,” dugang pasabot ni Ms. Ulay nga human sa tulo ka adlaw nga training, adunay madawat nga sertipiko ang mga partisipante gikan sa TESDA. 

Gawas sa bouquet ug corsage making, ang laing grupo sa 25 ka nanay ug tatay interesado sab kayo sa paghimo ug haplas (herbal oil) diin ang mga sangkap nga naa ra sa palibot sama sa panyawan, dahon sa tuba-tuba, ahos, luy-a ug ubang sagbot dali makit-an sa silinganan.

Si Mrs. Joy Sarno, Fe Marcelino ug Jenalyn Lasi nga taga Cebulano, Carmen maoy apil sa pagbansay alang sa paghimo ug haplas.

“Para di na mi makapalit ug haplas, maka-save na mi kay kami na mobuhat sunod kung makabalo mi ani nga training. Dili gasto kay herbal naa ra sa palibot makuha,” matod ni Mrs. Jenalyn nga gisuportahan sab sa kaubang mga inahan nga nag-andam sa mga sangkap.

Ang lungsod sa Carmen maoy ikalima nga gihatdan sa BEST PEOPLE Festival of Public Services Caravan sa administrasyon ni Gobernador Anthony del Rosario sa halos 100 ka serbisyo aron mapaduol ug makadaginot kwarta, kahago ug panahon ang mga Dabaonon.

Molungtad hangtod Byernes, Hunyo 15 ang paghatod sa mga serbisyo publiko.