SA IKATULONG adlaw (Hunyo 13), sobra na tulo ka libo ang nakadawat sa lain-laing serbisyo medikal nga dala sa BEST PEOPLE Festival of Services nga padayong gipahigayon diha sa Carmen, National Highschool, Carmen, Davao del Norte.     

Kagahapon, si Acan Siray, 73 anyos nga sakop sa tribong Manobo sa Talaingod ug karon nagpuyo sa Alejal, Carmen nagduhaduha sa sinugdan sanglit wala siya’y kwarta apan hilabihang lipaya pagkasayod nga walay bayad ang check-up ug bisan ang tambal. 

“Naa seguro bayad?. . Kaning dire nako, kaning bat-ang nako ba. . Basig naay bayad, wa ko’y kwarta,” pagpakita sa tigulang sa sakit nga bahin sa iyang lawas uban ang kalipay nga madawat niya ang serbisyo nga walay tulubagon.  

Ang magtiayong Monet ug Sandy Madayan nga taga Taba, Carmen, nagpahimulos sa serbisyong medikal alang sa panglawas lakip na ang para LTO nga mapasalamaton nga gidala ang mga serbisyo paduol.

“Miari ko dire aron maka-avail sa LTO ug sa marriage contract pod namo. . Marriage contract ug magpa-konsulta pod. . Dako’g katabang ni sa amoa nga walay panahon nga moadto’g layo aron mo-process parehas ning LTO, marriage,” matod sa magtiayong Monet ug Sandy.

Ang 11-anyos nga si Jay ug 10-anyos nga si Jayson naserbisyohan sa libreng pagtuli.

“Para dili ko ingnon ug pisot,” matod sa Grade VI pupil nga nagsul-ob ug dako, luag nga t-shirt human sa pagtuli.

“Pisot pa man ko. Sungugon man ko. . . Salamat kaayo,” tubag ni Jayson dihang gipangutana nganong nagpatuli uban ang pasalamat labina sa nadawat libreng tambal.

Bisan pa sa daghang kliyente nga giserbisyohan giapil pa gyod sa Provincial Health Office uban ang Department of Health ang mga out-of-school youths nga maatiman.

“Karong adlawa atong giatiman apil ang mga out-of-school youth, advocacy para sa ilaha, bahin sa teen-age pregnancy, HIV-AIDS, halos tanang programa nga haom sa ilaha maoy gi-input. .Naay mi-request ug tuli so naa ta’y tuli nga gipahigayon,” matod ni Provincial Health Officer Dr. Alfredo Lacerona nga uban sa iyang mga kauban sa PHO mitubag pod sa hangyo sa Land Transportation Office (LTO) kay walay doktor nga napadala ang maong opisina atol sa BEST PEOPLE caravan sa Carmen.

Sanglit maoy pinakadaghan nga giserbisyohan sa mga Serbisyo Caravan, gipasabot sa Provincial Health Officer nga walay limite ang serbisyo basta makaya sa ilang manpower ug bisan hangtod sa Carmen wala siya’y nadawat nga reklamo gikan sa iyang kaubang health service providers. 

“Wala ta naga-limit basta makaya lang sa atoang manpower. Dili pod uso limit-limit sa atoa. .  Ug so far sa ikalima, wala pa man ko’y nadunggan nga morag mibalibad o gikapoy na sila, mga batan-on pa man gud ni, kugihan pa sila manerbisyo . .gani alas sayis pa lang naga-jump-off na mi sa Capitol,” dugang pahayag sa PHO department head.

Ang lungsod sa Carmen maoy ika-5 nga gihatdan sa BEST PEOPLE Festival Caravan of Public Services ni Gobernador Anthony del Rosario nga mohangtod pa sa adlaw’ng Byernes, Hunyo 15.

DavNor News