Gob AGR nanawagan sa padayong kalinaw: Datu Guibang Apoga miapil sa Peace Rally

NANAWAGAN alang sa padayong kalinaw si Gobernador Anthony del Rosario atol sa usa ka Peace Rally nga gipahinabo kagahapon, Huwebes, Hunyo 21 didto sa Sto. Niño, Talaingod, Davao del Norte.

Sa pagpakita sa iyang suporta sa gobyerno, mitambong sab ang bag-ohay pa lang misurender nga si Datu Guibang Apoga uban ang kadagkoan sa Philippine Army 10ID Commander Major General Noel Clement, 1003rd IB commander Brig. Gen Ernesto Torres, Jr. ug Lt. Col Edwin Paredes, commander sa 56th Infantry Batallion nga nakabase sa Talaingod.

Sa iyang pakigpulong unang gipaila ni Gobernador Anthony del Rosario si Congressman Pantaleon Alvarez taliwala sa mga opisyales nga didto sab sa Peace Rally lakip ang Kapalong Mayor Marites Timbol.

“Karon nga adlaw, pinaagi sa suporta sa atong mahal nga presidente, si Presidente Digong Duterte, pinaagi sa atong Philippine Army, ilahang gipakusgan ang kalinaw dinhi sa atong probinsya sa Davao del Norte ilabina dinhi sa Talaingod. Pinaagi sa iyang tabang hapit na gyod nato makab-ot ang dugay na natong gipangandoy nga kalinaw dinhi sa Talaingod,” pahayag ni Gobernador Anthony atubangan sa daghang nanambong nga mga datu ug mga sakop sa tribo nga Ata-Manobo.

Gipasiugda sa gobernador nga sulod na sa dugay’ng panahon gipangandoy ang kahusay ug kalinaw sa Talaingod sanglit importante gayod kini sa kalamboan.

“Sukad-sukad pa ni sa una, ABC president pa ko sa Davao del Norte dugay na nato gihisgotan ang problema dinhi sa Talaingod sa peace and order. . Importante ato gyod mapatuman, mapatunhay ang kalinaw dinhi para samot na molambo ang atong munisipyo. Importante, kay kung walay panaghiusa, walay kalinaw, maglisod pod ta ipatuman ang atong pangandoy nga malamboon ang Talaingod,” matod sa Gobernador nga nagpahayag nga gipaningkamotan gayod sa probinsyal nga panggamhanan ang pagbutang sa daghang development projects bisan sukad pa sa termino sa kanhi Mayor Pilar Libayao.

Pinaagi sa usa ka tigpasabot (interpreter), gipahayag ni Datu Guibang Apoga nga mibalik siya sa gobyerno tungod kay tigulang ug nagkasakit na siya apan labaw sa tanan aron ang Sityo Nasilaban nga ilang gipuy-an gusto na gayod ug kahusay ug kalinaw.

Atol sa Peace Rally, gipalupad sa kahanginan nila Gob AGR, Datu Guibang, mga opisyales sa Army local nga mga opisyales ang gatosan puti nga mga balloons nga nagsimbolo sa kalinaw.


 

More Davnor Updates at

DavNor Karon

 

DavNor News