Miss Talaingod gikoronahan Bb DavNor 2018

GIKORONAHAN ang 24-anyos nga si Ms Talaingod Lesley Anne Ticaro nga nagmadaugon sa laing 16 pa ka kandidata aron ilhon nga Bb. DavNor 2018.

Si Ticaro maoy usa ka maestra sa hayskul nga mirepresentar sa Talaingod, ang giilang bugtong munisipyo nga gipuy-an sa sobra 80% nga mga Lumad sa tibuok Rehiyon XI.

Ang kusog nga pagbunok sa ulan wala makabugnaw sa mga nanan-aw ug giabi-abi ang bag-ong Rayna atol sa Coronation Night gabii sa Hunyo 28,s 2018, haylayt sa pagsaulog sa ika-51ng anibersaryo sa Araw ng Davao del Norte.

Si Bb. DavNor 2017 Mary Joy De Castro, nga nakasulod sa top 25 sa prestihiyosong Bb. Pilipinas 2017, ang nagkorona sa bag-ong Rayna.

Si Ms. Talaingod Ticaro sab ang midaug ingong Best in Cocktail Attire ug Best in Gown nga mga pasidungog.

Ang mahigugmaon sa hayop ug mahilig mobasa sa klasikong nobela midawat ug P200,000 premyong cash uban sa P80,000-kantidad sa dental services package gikan sa Fabular Dental Cosmetics ug P50,000- kantidad nga mga serbisyo gikan sa Toledo Medical Group, Inc., ingong laing premyo.

Nahimo sab nga Beautederm Ambassadress ang bag-ong Bb DavNor 2018 nga midawat ug P15,000-kantidad sa Beautederm Negosyo Package.

Kauban ni Bb. DavNor 2018 sila si 1st Runner-Up  - Louise Tan sa munisipyo sa Kapalong;  2nd Runner-Up – Andrea Jill Paraguas sa Tagum City; 3rd Runner-Up – Eloisa Monique Yepez sa Panabo City; ug, 4th Runner-Up Diune Andrea Bacena sa Tagum City nga nagkompleto sa top 5.

Dugang nagpasadya sa gabii sa koronasyon ang artista-host nga Maria Venus Raj, Miss Universe 2010 4th Runner-Up ug Mag-TV Na Cebu Host Jonathan Cimafranca.

Nga nalipay sa malampusong pagbalik sa Bb DavNor sa miaging tuig, gipasabot ni Gobernador Anthony del Rosario ang papel nga dulaon sa mga mananaug ilabina ang pagkahimong ambassadress of goodwill sa probinsya.

“(These are) Women who are ready to take on the challenge of telling the world the best stories of Davao del Norte from its 51 years of journey as a Province,” matod ni Gob AGR.

Matod sa gobernador nga ang Bb. Davao del Norte pageant maoy mahitungod sa “empowering our women and beginning journey of a confidently beautiful Binibining Dabaonon.”

Ang indigay sa kaanyag nahimong posible tungod sa suporta sa Vestida, TJ Garments, Dr. Fabular Dental Cosmetics, Cabahug-Soo Bookkeeping and Insurance Office, Khingchey Marketing, Skin Republik, Beautenook by Beautederm, CityMall of Tagum ug Toledo Medical Companies, Inc.

Ang ika-51ng anibersaryo sa pagkatukod ingong probinsya sa Davao del Norte hugtanong gisuportahan sa Tagum Agricultural Development Company, Inc. (TADECO), Ulticon Builders, Inc. ug MED 9, ang opisyal nga mga partners sa probinsya alang sa maong kasaulogan.


 

More Davnor Updates at

DavNor Karon

 

DavNor News