DavNor PSYDO may bag-ong opisina

MIBALHIN na sa bag-ong opisina ang DavNor Provincial Sports Youth Development Office (PSYDO) diha sa P30 milyones komersyal nga bilding nga gipanag-iya sa probinsyal nga panggamhanan sa Davao del Norte Lunes, Hulyo 9, 2018.

“Congratulations to PSYDO kay naa na sila’y bag-ong balay and I also know that you are the one in-charge of this area, the whole complex. I hope you were able to take care of it well kay people’s money gyod ni. And we’d like to thank Land Bank,” timbaya ni Gobernador Anthony del Rosario human sa blessing sa bag-ong opisina ug sa bodega sa PSYDO.

Mikabat ug sobra usa ka tuig ang konstruksyon nga gisugdan panahon ni kanhi Gobernador Rodolfo del Rosario nga gigastohan pinaagi sa P30 milyones nga pondo gikan sa Land Bank of the Philippines. Sa silong sa opisina sa PSYDO, gikaingon nga magbutang ug laing branch ang Land Bank samtang ang ubang mga stalls paarkilahan. 

“Ginahulat pa nato ang ordinansa para sa pagpa-arkila aning mga commercial space sa first floor. Base sa recommendation ni Giovanni is P308 per square meter, which is actually cheap for a new commercial center kay around the area moabot na man siya ug P450 per square meter. So very competitive gyod ang atong presyo. Wala pa nato ni gi-advertise kay ginahulat pa nato ang ordinansa,” pasabot sa gobernador labot sa mga stalls nga andam na sa komersyo.

Ang Provincial Sports Youth Development Office mao ang gitahasan sa programa nga may kalambigitan sa paugnat sa kusog ug lakip na karon ang programa alang sa mga batan-on. Ang DavNor PSYDO nagsilbi sab nga “Secretariat” sa hugpong sa Sangguniang Kabataan (SK).

“Dako ang iyang tahas, mao na nga kini nga bag-ong bilding dako gyod siya’g tabang aron magampanan sa PSYDO ang iyang bag-o ug mas lapad nga tahas for public service. Lipay kaayo mi sa dakong suporta gikan pa gyod na kang Gob RDR ug karon labi na kang Gob Anthony sa padayon gyod nga pagsuporta ug paghatag ug bili. Kining bag-ong creation sa PSYDO pasabot lang ani nga gi-permanente, mas gidut-an ang mga programa alang sa youth ug sports,” pasabot ni department head ug DavNor Sports Coordinator Giovanni Gulanes.

Sa entero Mindanao, bugtong ang Davao del Norte lamang ang naghimo nga departamento sa programa sa sports ug alang sa mga batan-on.


 

More Davnor Updates at

DavNor Karon

 

DavNor News