Mga lumad midagsa sa Festival of Services sa Talaingod

LIBOAN ka mga lumad nga sakop sa Ata-Manobo nga tribo gikan sa bukirong bahin sa lungsod sa Talaingod ang midagsa atol sa pagbukas sa lima ka adlaw BEST PEOPLE Festival of Services didto sa Sto. Niño Central Elementary School, Lunes, Hulyo 16.

“Karon nga adlaw nagsugod ang atoang weeklong Festival of Services. Sa una ang atong gihimo usa ka adlaw pero kulang kaayo kay ang uban dili makaadto. Karon wala na gyod mo rason nga dili mo makadawat ug serbisyo sa probinsya. Kung dili mo makaabot sa primerong adlaw, naa pa ikaduha, ikatulo, ikaupat ug ikalima nga adlaw. Tanan mga programa gikan sa Kapitolyo ako nang gidala dire para dili na ninyo kinahanglan pa moadto sa provincial capitol kay layo kaayo, mogasto pa mo. Gidala namo sa katilingban dinhi sa Barangay Sto. Niño para maka-avail gyod mo ug mga serbisyo gikan sa probinsyal nga panggamhanan,” pasabot  ni Gobernador Anthony del Rosario labot sa katuyoan sa BEST PEOPLE Caravan of Services.

Kauban sa Local Government sa Talaingod ug mga national agencies sama sa Department of Health, Department of Foreign Affairs (DFA), Army, PNP ug daghan pa, hiusang gitunol ang sobra usa ka gatos nga serbisyo ngadto sa sakop sa minoridad nga mga Lumad.

“Ang mga serbisyo dili lang gikan sa probinsya kundili gikan pod sa national agencies. Syempre pasalamatan pod nato ang atong presidente, Rodrigo “Digong” Duterte kay tungod sa iyaha nakadawat pod ta ug serbisyo gikan sa kaulohan pinaagi sa atong mga national agencies,” padayong pasabot ni Gob AGR labot sa presensya sa taga DOH, DFA, Army, PNP, PSA, LTO, Comelec, Register of Deeds ug daghan pa.

Giklaro sa Gobernador nga bisan kinsa pwedeng makadawat ug serbisyo bisan unsa pa ang iyang kolor sa panit o kolor sa politika basta nagpuyo sa Davao del Norte. 

“Basta kami sa atong probinsya sa Kapitolyo padayon lang mi naga-alagad ninyo, nagahatag serbisyo sa tanang katawhan way pili-pili ni bisan unsa’y kolor nimo; kolor sa imong panit, kolor nimo sa imong partido, way problema basta importante taga Davao del Norte ka, makadawat jud ka ug serbisyo gikan sa provincial capitol,” pagklaro ni Gob AGR sanglit dili pamolitika ang iyang paghatod paduol sa mga serbisyo.

Gawas sa mga serbisyo, gitunol sab ang sinakong abono, mga seedlings, toilet bowls ug wheel chairs alang sa pipila nga dili makalakaw. 

Ang Caravan of Services nakalibot na sa mga dapit sa Limbaan (New Corella), Braulio E. Dujali, Concepcion (Asuncion), Panabo City, Ising (Carmen) nga naghatag serbisyo sa libo-libong Dabaonon.


 

More Davnor Updates at

DavNor Karon

 

DavNor News