Buntis nga mga Lumad gitudloan

SOBRA usa ka gatos nga buntis nga sakop sa Indigenous People (IP) nga komunidad ang nakadawat ug pagtudlo unsaon pag-atiman ang ilang gimabdos atol sa Buntis Congress hatod sa BEST PEOPLE Festival Caravan of Services didto sa Talaingod, Martes, Hulyo 17.

“Ato na pong gipahigayon atoang Buntis Congress diin gitagaan gyod ug espesyal nga adlaw. Sa lima ka adlaw, lahi-lahi nga activities atong ginahatag nga serbisyo dinha sa inyoha. Kagahapon (Lunes) para to sa tanan, gikan sa bata hangtod tigulang gi-pangcheck-up. Karong adlawa, buntis ra gyod. Tanang serbisyo sa pagpre-natal ihatag gyod sa inyo karon, naay laboratory, mag-ultra-sound. Daghan na pod among gipang-imbitar nga mga doctor gikan sa DRMC, mga espesyalista diin buntis lang ang gina-atiman,” matod ni DavNor Provincial Health Officer Dr. Alfredo Lacerona.

Sa bisan diin nga caravan of services, pirmeng gidugok ang mga serbisyo panglawas. Gidugang sa DavNor PHO nga karong adlawa, Myerkoles, duna na sab libreng tuli ug tanang Senior Citizens na sab ang serbisyohan pagka sunod adlaw dayon ang mga bata pagka Byernes.

Ang managsilingan nga sila Mrs. Marideng Duwali ug Mrs. Patricia Saromines nga pulos buntis sa ilang ikaduhang anak migasto ug tig P50 pesos nga pamasahe gikan sa Purok Milyong, Talaingod aron lang gyod makadawat ug serbisyo para sa mga mabdos. Ang duha pulos mapasalamaton sa mga serbisyo.

“Pasalamat ko nga naa mo karon,” maulawon nga misulti si Patricia.

Gawas sa libreng tambal, bitamina ug serbisyo medical, nakadawat sab ang ubang buntis ug toilet bowl.

“To ngaran ko si Didith Sayad. Diha mi nagpuyo sa Tibi-tibi, unahan sa Bao-on. Nakadawat gani ko gahapon ug bowl. . Pasalamat pod mi’g dako nga naabot ni ilabina gyod sa akoa. Pasalamat pod ko’g dako nga isa pod ko sa napanalanginan nga nahatagan adtong bowl nga parehas sa amoa kabos gyod mi, wala pa gyod mi ikapalit ana,” pasalamat ni Didith sa sagol nga estorya sa Ata-Manobo ug Binisaya.

Bisan kung ikaduha na ang iyang gibuntis, unang higayon nga nakadawat ug pagtudlo labot sa pagmabdos si Mrs. Didith.

“Karong adlawa gusto nako nga mahuman gyod ni unsa ang dapat buhaton, unsay dapat, pareha aning buntis nga mahuman namo tanan nga serbisyo ang sa karon,” dugang ni Mrs. Didith Sayad.

Kauban sa Local Government sa Talaingod ug mga national agencies sama sa Department of Health, Department of Foreign Affairs (DFA), Army, PNP, PSA, LTO, Comelec, Register of Deeds ug uban pa,  gidala sa administrasyon ni Gobernador Anthony del Rosario ang sobra usa ka gatos nga serbisyo ngadto sa sakop sa minoridad nga mga Lumad.

“Tanan mga programa gikan sa Kapitolyo ako nang gidala dire para dili na ninyo kinahanglan pa moadto sa provincial capitol kay layo kaayo, mogasto pa mo. . Way pili-pili ni bisan unsa’y kolor nimo; kolor sa imong panit, kolor nimo sa imong partido, way problema basta importante taga Davao del Norte ka, makadawat jud ka ug serbisyo gikan sa provincial capitol,” pasabot  ni Gobernador Anthony del Rosario labot sa katuyoan sa BEST PEOPLE Caravan of Services sa pagbukas Hulyo 16 didto sa Sto. Niño Central Elementary School.


 

More Davnor Updates at

DavNor Karon

 

DavNor News