AGR gustong dunay representanteng PWD sa RDC XI

BUOT ni Davao del Norte Gobernador ug Regional Development Council (RDC) XI Chairperson Anthony del Rosario nga adunay representante nga Person With Disability (PWD) ang konseho pangkalamboan sa Rehiyon XI.

Sa ikaduhang adlaw sa pag-obserbar sa Davao del Norte National Disability Prevention and Rehabilitation (NDPR) week kagahapon, Hulyo 18, gipalanog sa gobernador ang iyang dakong tinguha nga adunay magdala sa hiniusang tingog sa mga PWDs.

Ilawom sa iyang administrasyon, gipahimutang dayon ang Persons With Disabilities Affairs Office (PDAO) ingong pagtuman sa RA 10070, ang balaod nga nagmando nga ang tanang probinsya, syudad ug munisipyo magbutang gayod ug opisina alang sa mga PWDs. 

“Kita sa Davao del Norte, sa atong Provincial Capitol, ginatagaan gyod nato ug mga programa ang tanang sektor sa atong lalawigan, . .naa na ta’y bag-ong PDAO, si Maam Martos ang atong point man. Ang rason nganong nagbutang ta ug ing-ana nga opisina kay gusto nato ipalig-on ug ipahiusa ang tanang PWD para mas kusog gyod ang inyong tingog. Kay sa tinuod lang usa kamo sa mga sektor nga wala mapansin sa gobyerno, . .kay kulang gyod ang representation ninyo sa gobyerno,” pahayag ni Gob AGR atubangan sa sobra 200 ka mga PWD presidente sa probinsya nga giubanan sa ilang mga ginikanan.

Ang gihimo sa probinsya gustong himoon sab sa RDC chairperson didto sa rehiyonal nga lebel.

“Karon lang nako na-realize nga walay representative gikan sa People With Disabilities didto sa Regional Development Council. Mao na ang mga question nga kinahanglan nato matubag karong adlawa pinaagi sa inyong mga dialogue ug pag-abot sa panahon kung naa mo’y usa ka lig-on nga grupo nga nagadala sa tingog sa tanan mga PWD sa tibuok Rehiyon XI, sultii lang ko kay ipa-miembro nako kamo sa Regional Development Council,” pasalig sa RDC XI chairperson nga gikalipay pag-ayo sa DavNor PWDs.

Dugang gipasabot sa RDC XI chairperson nga bisan ang hapit na sugdan proyektong Mindanao Railway wala nila mahisgoti ang kahimtang sa mga PWDs.

“Karon lang nako nahunahuna; accessible ba sa mga PWD ang train? Karon naa ko sa atubangan ninyo pero ako makasulti ninyo sa tinuod nga wa pa jud mi naghisgot bahin sa PWD. . Wala pa nako mapangutana bahin sa accessibility sa PWD, kay karon lang nako nahunahuna paglingkod nako dinhi kay wala ma’y representative didto sa Regional Development Council. And I hope we have strong leaders here that can bring together to unite dili sa mga PWD dinhi sa Davao del Norte pero ang tanan PWDs sa tibuok Rehiyon XI.

Sa pag-obserbar sa NDPR week gitudloan ang mga PWDs sa mga importanteng topiko ilabina ang Disaster Risk Reduction Management-Climate Change Adaptation ilabina kung dunay baha, First Aid Application at Home cum PWD Community Rehab ug Conference on Family Evacuation Preparedness. Gipahinabo sab ang kumperensya sa mga ginikanan sa PWDs aron ma-organisar ang Provincial Mobilization Action Group kun PMAG.


 

More Davnor Updates at

DavNor Karon

 

DavNor News