Sobra 4,000 naserbisyohan sa Festival of Services sa Talaingod

BUNTAG pa lang Byernes Hulyo 20, sobra 4,000 na ka tawo ang nahatagan ug klase-klaseng serbisyo sa ika-unom nga paghatod sa BEST PEOPLE Festival of Services didto sa Talaingod.

“Byernes karon, mao na ni ang ulahing adlaw sa atong BEST PEOPLE Festival of Services dinhi sa Barangay Sto. Niño apil ang duha ka barangay, Dagohoy ug Palma Gil. Kami nalipay kay base sa nadawat nako nga report sobra 4,000 to 5,000 gyod ang nag-avail sa atong mga services gikan sa probinsya, sa munisipyo, gikan pod sa atong Presidente Digong Duterte pinaagi sa mga national agencies. Nalipay ta nga daghan ta’y natabangan dinhi,” malipayong pahayag ni Gobernador Anthony del Rosario atubangan sa 62 kaslonon nga magtiayon ug sa tanang katawhan atol sa Kasalan ng Bayan didto sa Sto. Niño Gym.

Tungod kay kinahanglanon ug epektibo ang programa, matod ni Gob AGR nga himoon na’g kaduha sa usa ka bulan ang Serbisyo Caravan.

“Sunod bulan sa Agosto, himoon na namo ni kaduha ka beses. Ang sunod namo adtoan Brgy. Florida ug kadtong cluster barangays duol didto sa Kapalong. Pagkahuman ana moadto mi Sto. Tomas. Hinaut pagmahuman na ni mga munisipyo makabalik mi dinhi na pod sa Talaingod aron ibalik ang Festival of Services hangtod magsawa na mo sa among nawong. Moanhi gyod mi para mohatag ug serbisyo kay mao man na ang among gisaad ninyo nga kung kami modaug mobalos gyod mi pinaagi sa mga programa ug proyekto gikan sa gobyerno paingon dinhi,” pasalig ni Gob AGR sa taga Talaingod nga mga 80% sa populasyon sakop sa Ata-Manobo nga tribo.

Ang magtiayong Nono ug Ellen Manlatas sa Sitio Barobo, Talaingod dala nila ang pito ka anak nga pulos nacheck-up ug nakadawat mga tambal ug bitamina.

“Perteng daghana kay kami man tanan ang naa ani,” matod ni Nono ug Ellen nga malipayong nagpakita sa mga tambal ug bitamina.

Tungod sa mga nadawat mapasalamaton gayod ang magtiayong Manlatas.

“Pasalamat kaayo mi, maayo kaayo ning tawhana, si Anthony, Anthony del Rosario. Miabot baya ni sa amoa sa una. Dili pa tingali to governor, . . congressman. . miabot gyod sa among purok,” matod ni Nono.

“Marajow kamo nga serbisyoran tibo” (Maayo ang ilang pagserbisyo silang tanan), dugang pasalamat ni Nono.

Si Mrs. Didith Sayad maoy usa lang sa liboan nga “tayming” nga nahatagan ug toilet bowl gawas pa sa tibuok maternal health care nga serbisyo alang sa buntis.

Kauban sa Local Government sa Talaingod ug mga national agencies, hiusang gidala sa administrasyong Anthony del Rosario ang sobra usa ka gatos nga serbisyo ngadto sa minoridad nga mga Lumad.

“To ngaran ko si Didith Sayad. Doon kan, diha mi nagpuyo sa Tibi-tibi. . Pasalamat pod ko’g dako nga isa pod ko sa napanalanginan nga nahatagan adtong bowl nga parehas sa amoa kabos gyod mi, wala pa gyod mi ikapalit ana,” malipayong misulti si Didith sa Ata-Manobo ug Binisaya nga midugang nga karon lang makompleto ang mga serbisyo atol sa iyang ikaduhang pagbuntis. “Karong adlawa gusto nako nga mahuman gyod ni unsa ang dapat buhaton, unsay dapat, pareha aning buntis nga mahuman namo tanan nga serbisyo ang sa karon.”


 

More Davnor Updates at

DavNor Karon

 

DavNor News