DESIDIDO gayod ang probinsyal nga panggamhanan sa Davao del Norte nga patas-on pa ang produksyon sa humay..
Atol sa Kapihan sa Kapitolyo kagahapon, Huwebes, Agosto 2, gibutyag ni Provincial Agriculture Office department head Dr. Anastacia Notarte ang mga paningkamot nga gihimo sa administrasyon ni Gobernador Anthony del Rosario (AGR) aron modaghan pa ang pangunang pagkaon sa mga Dabaonon.
“Kung kami sa Provincial Agriculturist Office ang pangutan-on mahitungod sa supply sa bugas dire sa Davao del Norte we are still sufficient. Base sa atong datos niadtong dry season naa ta’y na-harvest nga about 92,000 metric tons. Kung atong i-compare ang atoang sufficiency level between 2016 and 2017. Adtong 2016 naa ta’y 84.59% sufficient and then pagka 2017 nagiging 86.72%. . kana sa humay lang walay labot sa atong mais, cassava, camote ug uban nga pwedeng makaon sa atong stakeholders dire sa Davao del Norte,” pahayag ni Dr. Notarte kauban ang NFA Provincial Economist Engr. Susana Asejo.
Gitun-an karon sa DavNor PAGRO ang pagsulay sa 3rd cropping technology.
“Naa ta’y upat ka location sa third cropping sa New Corella, Asuncion, San Isidro and at the same time second cropping sa Sto. Tomas. Sa Asuncion, naa ta’y 175 hectares nagtanom adto pero 30 plus nagre-plant gyod because of the occurrence sa steam borer ug black bug. Pero ang municipality sa San Isidro ug New Corella maayo siya’g lusot ingon man ang Sto. Tomas. Hopefully by next month ato na siyang makuhaan ug datos. Naa pa ta’y duha ka cropping season nga makaingon gyod ta kung feasible ba gyod ang third cropping kay gusto gyod namo magiging 100% sufficient sa rice dire sa Davao del Norte,” dugang pahayag ni Dr. Notarte.
Ang laing paningkamot nga gihimo sa AGR administrasyon pinaagi sa PAGRO mao ang pag-engganyo sa mga rice farmers nga kadtong dali matubigan nga lugar tamnan na lang ug humay.
“Base sa atoang NIA ang potential area is about 52,000 hectares. But of this time naa lamang ta’y 18,000 hectares. So kung madugangan ang irrigation system dire sa Davao del Norte mosamot pa gyod kadaghan,” dugang pasabot sa babayeng agrikulturista.
Ingong agrikultural nga probinsya, ang unang “E” sa BEST PEOPLE development agenda ni Gob AGR nagtumong sa Enhanced Agri-Aqua culture aron gyod maseguro ang pagkaon sa mga Dabaonon.
Matag tuig, padayon ang paghatag sa probinsya sa mga pre ug post-harvest facilities pinaagi sa PAGRO aron sab mamenosan ang mga usik sa humay. Karon lang nga tuig tulo ka Combine Harvester ang gitunol ngadto sa mga rice farmers’ association. Aduna sab kini programa nga Production Loan Easy Access (PLEA) ngadto sa mga mag-uuma nga tig P20,000 matag ektarya sa gamay 6% nga tubo matag tuig.
Kanunay sab gipondohan matag tuig sa AGR administrasyon ug P2 milyones nga crop insurance aron gyod maseguro pananglit dunay baha o laing kadaot ang seguridad sa pagkaon ilabina sa mga mag-uuma.
