AGR gipasigarbo unang 36 Lumads migradwar sa Talaingod extension college

PUNO sa kalipay ug mapasigarbohon si Gobernador Anthony del Rosario nga sa unang higayon migradwar ang traynta’y sayis ka mga sakop sa Ata-Manobo nga tribo sa 2-ka tuig Diploma on Agricultural Technology gikan sa Datu Jose A. Libayao--Davao del Norte State College (DJAL-DNSC) extension campus didto sa Talaingod, Huwebes, Agosto 2.

Sobra duha ka tuig na ang milabay dihang gihimo ang kasabotan tali sa probinsyal nga panggamhanan sa Davao del Norte, DNSC ug uban pang ahensya sa gobyerno alang sa libreng edukasyon sa kolehiyo sa nga gipahaom ang kurso alang sa mga Lumad sa Talaingod. Ang mga gambalay sa Talaingod Tribal Council nagsilbing klasehanan ug dormitoryo sa 36 ka mga IPs.  

“Malipayon ug mapasigarbohon ako nga mosaksi sa inyong kalamposan karong adlawa. Human ang pila ka tuig nga inyong paningkamot sa mga gabii nga pagpulaw inyong nalampasan ang importanteng hugna sa inyong kinabuhi. Salamat sa inyong paghatag ug dakong bili sa kahigayonan nga gihatag kaninyo,” pag-ila ni Gobernador AGR sa mga sakripisyo sa mga Lumad estudyante nga daghan kanila mga inahan na ug nagpuyo layo gikan sa eskwelahan.

Gidasig sa gobernador nga bisan sa ilang nalampos angayan dili kalimtan sa mga migradwar ang ilang kagikan.

“Sa inyong pagkab-ot sa inyong damgo ayaw kalimti ang inyong kagikan. Gamita kini nga kalamposan dili lang sa pagpauswag sa inyong kaugalingon, pahimusli kini sa pagpalambo sa inyong komunidad ug pag-ugmad sa inyong kultura, kabilin ug ilhanan,” padayon awhag ni Gob del Rosario nga mao ang guest speaker sa unang gradwasyon sa DJAL-DNSC.

“Espesyal” sab nga gihangyo sa gobernador ang mga dalaga ug ulitawo nga nagtapos sa duha ka tuig nga Diploma on Agricultural Technology aron matuman ang iyang pangandoy alang sa kalamboan sa Talaingod.

“Kinsa dire ang ulitawo o dalaga pa? Ayaw pagminyo ugma ha? Motrabaho una mo. Unya na nang minyo-minyo, dali lang magminyo. Ug ang akong hangyo kaninyo aside from ayaw pagminyo, nga tabangi intawon kami aron matuman ang atong damgo alang sa Talaingod. Pinaagi sa inyong tabang ug suporta sa katawhang Lumad ako naghinaut nga atong makab-ot ang atong panglantaw nga mahimong dairy farm capital, vegetable capital, livestock capital ug eco-cultural tourism ang lungsod sa Talaingod,” dugang pagdasig sa Davao del Norte gobernador.

Aron dayon makasugod ang mga migradwar, silang tanan nakadawat ug farmer starter kits nga naglakip sa usa ka gatos cacao seedlings, lima ka seedlings sa lanzones, lima ka seedlings sa kape, usa ka pack sa vegetable seeds, garden tools nga pala, rake, sprinkler, lima ka seedlings tray, trowel, slashing bolo ingon man mga manok lakip na ang veterinary drugs ug medisina gikan kang Gobernador Anthony del Rosario pinaagi sa Provincial Agriculture Office ug Provincial Veterinary Office.

Gipasalamatan sab ug dako ni Gob AGR ang mga opisyales sa eskwelahan ug sa probinsyal nga panggamhanan sa Davao del Norte nga mituyo gyod pagtambong sa pinakaunang gradwasyon sa DJAL-DNSC.


 

More Davnor Updates at

DavNor Karon

 

DavNor News