Unom ka adlaw Serbisyo Caravan gihatod sa Kapalong

SUKWAHI sa unang mga Serbisyo Caravan, unom gyod ka adlaw ang pagpista sa mga residente sa Barangays Mabantao, Florida, Suaon, Datu Balong ug Gupitan, pulos sakop sa Kapalong Davao del Norte, sa usa ka gatos klase nga serbisyo nga gisugdan Domingo hangtod Byernes (Agosto 5-10, 2018) didto sa Domingo National High School sa brgy Florida.

“Tinuod gyod ang giingon ni Kapitan nga nadugangan mo usa ka adlaw. Sa uban man gud Monday to Friday lang mi. Tungod kay ang ngalan sa inyong eskuylahan Domingo, mao na nga rason nga nagsugod pod mi ug Domingo. Usa sa mga hangyo kining salog dinhi patas-an kay nagabaha kung kusog ang ulan. Approve na na. Mao na ang usa nga atong pagabuhaton nga proyekto dinhi sa inyong eskwelahan,” pasalig ni Gobernador Anthony del Rosario ngadto sa principal sa eskuylahan ug sa mga barangay opisyales.

Kay mao ang pinakalayo, ang taga Brgy Gupitan gitabangan nga makaabot sa nahimutangan sa Serbisyo Caravan pinaagi sa pagtagana ug sakyanan sa gobyerno ilabina ngadto sa masakiton ug mga buntis.

“Kung naa mo’y mga paryente ingna lang sila way bayad-bayad ni. Mag-anhi lang mo para makadawat ug serbisyo. Gikan ni sa Kapitolyo, tanang departamento. Naa pod mga ahensya gikan sa national government. Bisan private sector naa pod, ang Soroptimist International. Mga priority services nga gusto nato paabuton sa tanang katawhan gikan sa Kapitolyo para di na mo magkinahanglan moadto didto, kami na lang ang moduol tanang serbisyo para maka-avail gyod mo. Programa ni alang sa tanang katawhan sa Kapalong. Wa mi pili-pili unsa’y kolor sa imong panit, unsay kulay sa inyohang partido, walay ing-ana. Basta kamo residente sa Kapalong, taga Davao del Norte, makadawat gyod mo ug serbisyo gikan sa Capitol. . Dili ni pamolitika, panerbisyo ni sa katawhan,” pagklaro sa gobernador sa libreng sosyal ug legal nga mga serbisyo gawas pa sa libreng mga tambal ug bitamina nga madawat.

Si Dani Otao nga taga Sitio Kimataan, Gupitan milugsong gyod bisan kung ang distansya sobra kwarenta kilometros aron makapahimulos sa mga serbisyo.

“Naa akong pamilya, akong asawa. Pa-check-up, paibot ngipon, mga saki-sakit pa-check-up. Nagpasalamat gyod ko ug dako nga kini nga Caravan niabot aron ang mga layo nga dapit makaduol dire aron masulbad ilang problema.

Gawas kang Dani, gikan pod sa Sitio Patil, Gupitan si Rosalina Linsagan nga dala ang iyang apo aron magpa-check-up.

“Akong apo. Dako naman akong anak mga dise-sayis. Magpa-tsek-ap mi, ako pod magpa-tsek-ap. Salamat nga gikuha mi sa mga serbis tungod sa kalayo sa amoa. Salamat gobernador,” matod ni Rosalina.

Sa tuyo nga maabot gyod ang tanang Dabaonon sa kinahanglanon pangunang serbisyo labi na sa panglawas, ang Caravan of Services nakalibot na sa Limbaan (New Corella), Braulio E. Dujali, Concepcion (Asuncion), Panabo City, Ising (Carmen), ug Talaingod. Sunod nga hatdan sa mga serbisyo mao ang lungsod sa Sto. Tomas, Davao del Norte.


 

More Davnor Updates at

DavNor Karon

 

DavNor News