PAGPULAW, momata ug sayo, mobaktas ug layo, pagkugi, maoy pipila lamang sa kahago nga giagwanta uban ang pagsakripisyo sa traynta’y sayis ka mga sakop sa tribong Ata-Manobo, ang pinaka-unang migradwar sa Datu Jose A. Libayao College-Davao del Norte State College (DJAL-DNSC) extension campus sa kursong Diploma on Agricultural Technology niadtong Huwebes Agosto 2, 2018.

Ang pagkamugna sa DJAL-DNSC extension campus maoy bunga sa paningkamot sa administrasyon ni Gobernador Anthony del Rosario ug mga opisyales sa Kapitolyo nga ipaduol ang edukasyon ilabina ngadto sa ubos nga kahimtang sa kinabuhi nga mga Lumad.      

Bisan kung may duha na ka anak, si Mrs. Nida Tipay naningkamot ug maayo aron makahuman ug eskwela sa tumong nga daling makatrabaho ug makatabang sa iyang bana. Tungod sa kalisod kinahanglang dala-dalahon niya ang iyang anak sulod sa duha ka tuig nga pag-eskuyla. 

“Di man pod ni sipat nga bata, buotan, maminaw man pod ni akong anak. Ako siyang giuban-uban sa pag-eskwela, makit-an niya dapat diay moeskwela pod siya pag-abot sa panahon para mahimo pod ko niyang modelo. Sugod pa first year, mag-dede pa ni siya, mag-beberon. Di pa ni kabalo molakaw,” matod ni Nida nga halos mohilak sa kalipay nga nakahuman.

“Nagpasalamat gyod ko kay Governor kay tungod kay gihatagan pod mi niya kanang duol nga eskwelahan. Layo na man mag-adto pa mi sa Kapalong, among transportation, kaon pa, basta daghan gyod akong pasalamat sa iyaha. Gitagaan pa gyod mi niya among magamit sa uma, naa pod mga seedlings, nagpasalamat gyod mi sa iya,” pahayag ni Nida apresasyon sa college sa ilang duol.

Uban sa hinulaman nga motorsiklo, nga may upat ka anak, si Geraldine Libayao sulod sa duha ka tuig Lunes hangtod Byernes mobaba-mosaka sa ilang dapit sa Sitio Misolong nga 15 kilometros ang gilay-on aron lang gyod maka-eskwela.

“Mangadlawon ko ug mata, alas tres maglung-ag, init ug tubig, manglaba, pagka alas kwatro maligo na, dayon atiman sa akong mga anak, pagka alas sayis ga-anhi nako dinhi sa eskuylahan. Mata ko’g alas tres magluto-luto pa ko ug harina padala sa akong anak sa eskuylahan para naa pod sila’y mabalon. Kay dili man lang ako ang magbalon pati man pod ang akong upat ka anak, nag-eskuyla man. Naa ko’y Grade 8, Grade 6, Grade 3 ug naa pa gyod ko’y Grade 1,” saysay ni Geraldine sa sakripisyo aron lang gyod makatapos.

“Sangko jud sa langit ang akong kalipay nga nay college dire sa Talaingod. Sa una nag-eskuyla mi naundang jud kay ang among transportation perte jung lisora. Salamat jud sa among Manama nga gitagaan gyod pod mi ug grasya nga dire butangan ug college. Pagkabalo nako nga naay college dire, naglukso-lukso jud ko sa kalipay nga mo-eskuyla jud ko kay mao jud na akong pangandoy. Paeskuylahon jud nako kung mag-agriculture sila, mag-maestra sila paeskuylahon jud nako dire sa DNSC extension,” hilabihang pasalamat ni Geraldine nga gihatagan pa gyod sila ug farmer starter kit uban sa mga seedlings nga iya gyod itanom.

“Salamat jud kaayo kay Gov nga gitagaan mi ug starter kits, itanom jud to nako,” subli pasalamat ni Geraldine Libayao uban sa laing pagpasalamat sa sinultihang Ata-Manobo.

Si Nida ug Geraldine uban ang kaubang Ata-Manobo nga migradwar malaumon kaayo nga sa tabang sa edukasyon molambo ang ilang tribo.

DavNor News