WALAY BAYAD nga mga serbisyo gikan sa check-up, OB consultation, dental, laboratory, pre-natal, ultrasound, mga tambal ug bitamina ingon man maternal kits pulos libre nga nabatonan sa tanang buntis nga Dabaonon matag panahon gihatod ang BEST PEOPLE Festival of Services.

Niadtong Martes, Agosto 7, sobra 100 ka buntis nga nanay gikan sa Barangays Suawon, Mabantao, Gupitan ug Florida ang nakadawat sa tanang serbisyo alang kanila.

“Kami sa health, amo gyong gipaningkamotan nga dili lang isa, duha ka programa ang among mahatag nga serbisyo sa inyoha. Gusto namo nga tanang serbisyo sa health mahatag gyod namo sa lima ka adlaw. Sa lima ka adlaw, lahi-lahi nga serbisyo among gihatag sa inyoha, general consultations, buntis, naa po’y adlaw para sa Senior Citizens, para sa mga bata,” pasabot ni Provincial Health Officer Dr. Alfredo Lacerona nga miklaro nga “sosyal” ang pag-atiman nga gihatag sa mga buntis.

“Makaingon ko nga mas “sosyal” ang among pag-atiman sa inyoha dinhi sa Buntis Congress kay sa private nga doctor o private nga OB. Kay ang private nga OB isa lang to ka doctor, tan-aw tan-awon, hilam-hilamon ing-ana, aircon lang tong ilang kwarto, pero dire dili tuod aircon pero bitbit na namo ang laboratory, dentist, kumpleto na siya. Unya inig-uli pa gyod ninyo unya naa pa gyod mo mabitbit,” dugang pasabot sa Provincial Health Officer nga nagpasabot sa libreng maternal kits nga nasudlan na sa mga gamit alang sa manganak.

Si Davao del Norte First Lady Ms. Aina del Rosario presente sab aron dasigon ang mga buntis.

“Kitang mga kababaihan ang nag-unang tig-atiman sa atong mga pamilya ug usa sa pinakaimportanteng impluwensya sa pagdako sa atong mga anak. Kabalo ko unsa ka lisod ang mahimong inahan. Dili lang physically kundili apil mentally ang kakapoy. Pero ang tanang sakripisyo aron maseguro nga luwas sa daotan ang atong pamilya mawala pagmakita nato ang atong mga anak nga happy ug healthy,” matod sa asawa ni Gobernador AGR nga usa sab ka registered nurse una naminyo.

Labi pa nga gidasig sa province’ first lady ang breasfeeding.

“Ako breastfeeding advocate pod ko kay very important gyod nga matilawan sa mga bata ang breastmilk because naa dira ang tanan antibodies nga makatabang sa ilahang pag-fight sa mga sakit, so that is the importance of breastmilk, gikan sa ilang mama ang antibodies,” padayong pasabot ni Ms. Aina del Rosario nga nagpaambit mismo sa iyang kasinatian.

Ang mga doktor sa PHO giubanan sab sa mga espesyalistang doctor gikan sa Davao Regional Medical Center (DRMC) ug sa Department of Health (DOH) aron lang gyod espesyal maatiman ang mga buntis matag hatod sa BEST PEOPLE Festival of Services nga nakalibot na sa New Corella, Braulio E, Dujali, Asuncion, Panabo City, Carmen, Mankilam, Tagum City, Talaingod ug dinhi sa Kapalong.

DavNor News