GILUSAD sa Local Government of Sto. Tomas sa pakigtambayayong sa DavNor Provincial Health Office ug ubang ahensya sa gobyerno ang Teen Tambayan aron matabangan ang mga tin-edyer sa ilang suliran sa panglawas, teenage pregnancy ug ubang psychosocial nga mga problema, Myerkoles, Agosto 8.

Ang psychosocial nga mga suliran naglakip sa pagpakamatay, giabusohan sa sekswal, panigarilyo, panugal ug daghan pa nga gisagubang karon sa mga batan-on dili lamang sa probinsya kundili sa tibuok nasod.

“Ngano man jud nga kinahanglang magtukod ta ug Teen Tambayan dire sa Sto. Tomas? Sa panahon nga dunay problema ang tao, duna ba siya’y maduolan, matawag niya nga “friend” nga andam maminaw sa iyaha ug sa iyang mga problema? So karon andam na kaayo ang Sto. Tomas, naa na sila’y Teen Tambayan Center nga dunay maduolan sa panahon nga dunay problema, counselling nga tug-anan nato sa atong gibug-aton,” matod ni DavNor Teen Tambayan coordinator Christine Carole Sanico.

Sa miaging tuig 2017, ang teenage pregnancy sa Davao del Norte miabot ug 3,023, diin nag-una ang Tagum City nga adunay 704 ug gisundan sa Panabo sa 543. Ikatulo ang Sto. Tomas nga adunay 303 ka natalang kaso sa tin-edyer nga nagbuntis 10 hangtod 19 anyos ang edad.

“I-challenge nako ang atoang PopCom head dinhi sa Sto. Tomas nga mo-re-echo ni abot sa mga kabarangayan, sa matag barangay, dapat naa po’y tambayan didto sa mga barangay,” matod ni Sto. Tomas Mayor Daniel Batosalem nga nagpasabot sa kaimportante sa Center nga gani iyahang butangan ug usa ka permanenteng empleyado.

Sa tibuok Rehiyon XI, pinakauna ang probinsya ilawom sa administrasyon ni Gobernador Anthony del Rosario nga nagpatungha sa “Provincial Health and Development Code of the Young People of Davao del Norte” nga nahimong lokal nga balaodnon alang sa kaayohan sa mga batan-on.

“Kining atong Health Code para sa kabatan-onan nga akong gipirmahan last year usa gyod ka importanteng balaod kay dako na gyod ang problema sa youth sector ilabina sa mga issues sa pregnancy, droga, isyu sa HIV ug uban pa nga maka-lead ug suicide. The incidence of teenage suicide is increasing in the Philippines. Usa sa mga rason ani tungod kay ang mga kabatan-onan karon wala silay makaestorya,” matod ni Gobernador Anthony del Rosario nga nag-warning pa gani nga dili angayan nga adto i-estorya sa batan-on ang iyang problema nga sa sama ra niya ug edad.

Sa tibuok Davao del Norte adunay 12 ka Teen Tambayan diha sa Braulio E. Dujali (RHU)  Tagum City, Panabo City, New Corella, Kapalong, Asuncion ug bisan sa Davao Regional Medical Center (DRMC) Adolescent and Youth Health and Wellness Clinic.

DavNor News