ANDAM na motukod ug “Balay Silangan” ang probinsyal nga panggamhanan sa Davao del Norte nga magsilbing sentro sa pagreporma sa mga “drug offenders” aron mahimong makabarog sa ilang kaugalingon ug masinundanon sa balaod nga membro sa katilingban.

Ang pwedeng makabenepisyo sa Balay Silangan mao kadtong mga nagsurender nga walay kasong kriminal, warrant of arrest ug dili sab High Value Target sa Philippine Drug Enforcement Agency (PDEA) agents ug mga kapolisan.

Atol sa Provincial Anti-Drug Abuse Council (PADAC) miting didto sa Lakan’s Place, Tagum City, Agosto 16, gipasalig ni Action Officer ug DavNor Probinsyal Administrador Samson Sanchez nga ang administrasyon ni Gobernador Anthony del Rosario pasiunang naggahin ug P5 milyones aron matukod ug magamit kini sunod tuig bisan pa man kung sa kasamtangan wala pa madesisyoni asa dapit sa probinsya kini ipahimutang.

“Rest assured Governor Anthony will really implement the Bahay Silangan next year. This is in support to the program of the president on anti-drug abuse campaign. Not only that, the DILG next year, in the Seal of Good Local Governance will really look into the establishment of this Bahay Silangan. Ma’am, rest assured this undertaking will be implemented by the province next year,” pasalig ni PA Sanchez ngadto kang Director II Donelyn Hemedez, Director on Preventive Education & Community Involvement Service sa PDEA Central Office.

Gipasabot sa PDEA Director nga ang Balay Silangan maoy maluluy-ong paagi sa gobyerno sa pag-implementar sa RA 9165, ang Anti-Drug Abuse nga balaod, diin ang mga masalaypon tudloan ug bansayon alang sa panginabuhi o kaha aron maka-negosyo inig gawas nila sa sentro aron makasugod ug bag-ong pagkinabuhi. 

“All clients who completed the program makaka-received po sila ng Certificate of Completion. Lahat ng training, livelihood education na ibibigay sa kanila sa Balay Silangan Reformation Center bibigyan po ng Certificate. Ito ang gagamitin nila sa pag-aplay ng trabaho at pagput-up ng kanilang business,” esplikar ni PDEA Direktor II Hemedez.

Atol sab sa maong miting gitaho ni Provincial Prosecutor Norman Solis nga base sa mga kaso nga ilang gisang-at, sobra 70% niini may kalangkitan sa droga.

Apan bisan pa sa nahimong kalapasan, gipabilhan gayod sa administrasyon ang kinabuhi. Gawas sa tukoron nga Balay Silangan, may natukod na ang Davao del Norte nga Luntiang Paraiso Rehabilitation Center nga nagsilbing Regional Center sa pagtambal sa adiksyon sa droga, alcohol, sigarilyo ug bisan cyber addiction. Duna pa gyod kini Bahay Pag-asa Rehabilitation Center alang sa mga pinasagdan nga mga batan-on.

DavNor News