GIPAHIMUSLAN sa mga batan-ong Nanay ang libreng “Implanon,” usa ka 99% epektibo apan dili mahal nga pamaagi sa pagpugong sa pagbuntis, atol sa paghatod sa BEST PEOPLE Festival Caravan of Services didto sa Kimamon, Sto. Tomas, Davao del Norte, Lunes, Agosto 20.

Hinuon ang Serbiyo Caravan dili lamang para sa taga barangay Kimamon. Apil na niini ang barangays New Katipunan, Lungaog, Pantaron, Talomo ug bisan ang mga silingang barangay sa Kapalong wala pugngi nga moadto aron magpahimulos sa halos usa ka gatos nga lain-laing serbisyo sa sosyal, panglawas, legal ug bisan moral nga serbisyo.

Si Mrs. Jacqueline, 21 anyos nga nanay, taga Lungaog ug dunay tres anyos nga anak nagpa-insert ug implanon.

“Kung magsige ko’g panganak, kanang magkasakit gani, diha man jud maproblema kay lisod kaayo. Sige’g panganak wala ta’y ikagasto,” praktikal nga tubag ni Mrs. Jacqueline.

Nga mapasalamaton, iyang gipili ang implanon tungod sa tulo ka tuig nga pagka-epektibo.  

“Dako akong pasalamat ani kay mataas-taas pa imong control sa imong sarili. Taas pod ang kuan sa imong anak kay pills man gud dali ra ka makalimot, mahimo masundan pa,” rason ni Jacqueline nganong nag-implanon siya.  

Si Mrs. Jovelyn, 28 anyos ug dunay kwatro anyos nga anak nagpahimulos sa libreng implanon aron maplano pag-ayo ang kaugmaon sa iyang anak.

“Para maplano nimo ang future sa imong anak. Nag-pills man ko sa una. Gi-try lang nako kay gi-kuan mi sa among midwife nga suwayan. Salamat kaayo. Salamat Gob,” matod ni Jovelyn.

Matod ni DavNor PHO nurse Choi Lucas III nga samtang libre na ang implanon ug ang serbisyo sa mga health personnel atol sa Caravan of Services, kini sa pribadong hospital maoy mahal. 

“Ang price sa isa ka implant nagkantidad ug between 4,000 to 5,000 pesos kung sa private, kung paliton gyod nimo siya, way pa’y labot ang fee sa doctor nga mag-insert. Gi-donate na man ni sa DOH, so gihatag pod ni nga free,” pagtug-an ni PHO nurse Choi Lucas III nga nagpasabot nga sa pag-abot sa tulo ka tuig, tanggalon na sab ang implanon. 

Si 2nd District Board Member Roy J. Catalan nga naghatod sa mensahe ni Gobernador Anthony del Rosario mikomento nga angayan gayod nga sundogon sa tibuok nasod ang BEST PEOPLE Festival Caravan of Services tungod sa gipaduol nga mga kinahanglanong serbisyo diha mismo sa tugkaran sa mga residente. 

“Ang gihimo nga programa sa atong governor dili lang ingon basta-basta. This should be replicated to the whole archipelago of the Philippines just because all the services nga gihatag sa katawhan naa na gyod, kumpleto na gyod,” matod ni BM Catalan nga gipasalamatan sab ang mga department heads sa Kapitolyo, Congressman Tony Boy Floirendo ug mga lokal opisyales sa lungsod ug barangay. 

Ang BEST PEOPLE Festival Caravan of Services nakahatod na sa mga serbisyo didto sa New Corella, Braulio E. Dujali, Asuncion, Panabo City, Carmen, Talaingod ug Kapalong nga libreng nagserbisyo sa libo-libong Dabaonon.

DavNor News