BISAN pa sa ilang linghod nga panuigon, nagpakita ug hamtong nga panglantaw ang Youth for Environment Schools-Organization (YES-O) sa lungsod sa Sto. Tomas pinaagi sa pagpakabana sa kinaiyahan.

Pinakauna sa BEST PEOPLE development agenda ni Gobernador Anthony del Rosario, gitutokan sa letrang “B” nga nagkahulogan ug Balanced Ecology, ang pag-atiman ug pagpreserbar sa kinaiyahan sanglit ang paglungtad sa kinabuhi apektado kaayo sa presente nga kahimtang sa gipuy-ang kalibotan.

Sa ikatulong adlaw (Agosto 22) sa BEST PEOPLE Festival Caravan of Services didto sa Barangay Kimamon, Sto. Tomas, gidasig sa batan-ong lider ang iyang mga kaubanan kay gawas nga makatabang sila sa pag-atiman sa kinaiyahan, mahimo sab nga sila “maka-kwarta.”

“I-try nato siya kay maka-kwarta and at the same time makatabang ta sa atong environment,” pagdasig sa YES-O lider sa halos usa ka gatos nga mga batan-on nga kasagaran nagtungha sa hayskul.

Matag libot sa BEST PEOPLE Festival of Services, kanunay nagpahigayon ug tree-planting ang DavNor Provincial Environment Natural Resources Office (PENRO) diha sa identified barangay sites, school sites lakip ang daplin sa suba kung ang ang lugar aduna niini.

Ug aron maatiman ang ilang natanom nga mga kahoy, ilang gi-abot ang mga organisasyon lakip ang mga batan-on nga maoy moamoma hangtod unom ka bulan, ang panahon nga gitawag ug “critical” alang sa usa ka nagtubo nga kahoy ilis sa 10 ka kilo nga bugas matag bulan.

“Next is the planting, caring and growing of trees. Parehas sa atoang kanta Growing DavNor: Caring, growing and planting of trees. Kinsa man ang nakatanom na ug mga kahoy, nakaapil sa tree planting? Gikumusta na ba ninyo ang inyong mga kahoy?” dugang pagdasig ug pahinumdum sa YES-O lider saiyang mga kaubanan.  

Gawas sa pagpananom ug kahoy, ang DavNor PENRO padayon sab nga naghimo ug mga adbokasiya pinaagi sa mga symposyum labot sa kinaiyahan ug ubang mga topiko nga langkit sa pag-preserbar sa atong kalikopan.

DavNor News