USA KA GATOS KAWHAAN UG USA ka paresan mansibado nga mga magtiayon ang nagpakasal atol sa libreng Kasalan ng Bayan nga gihatod pinaagi sa BEST PEOPLE Festival of Services Byernes, Agosto 24.

Ang kasalan maoy usa lamang sa halos usa ka gatos nga serbisyo nga gidala alang sa mga residente sa lima ka barangay sa Sto. Tomas: Kimamon, Lungaog, Pantaron, Talomo ug New Katipunan. Wala hinuon pugngi ang si bisan kinsa nga gustong magpahimulos serbisyo.

“Kining Festival of Services man gud gihimo namo ni tungod kay kami nagatuo nga kasagaran sa mga katawhan maglisod gyod na sila pag-adto sa Kapitolyo para mangayo’g tabang tungod sa kalayo sa lugar. Ang among gihimo ang gobyerno among gidala dinhi sa barangay para di na mo maglisod pangita ug mga serbisyo gikan sa lain-laing departamento sa national, provincial and municipal levels,” pahayag ni Gobernador Anthony del Rosario nga mao ang prinsipal ninong sa tanang gikasal kauban ang department heads sa DavNor Kapitolyo.

Gipasabot sab sa gobernador nga dili gyod maayo ang magbulag apan pananglit mosangko gyod, kinahanglanon atubangon gihapon sa mga amahan ang ilang responsibilidad sa pamilya ilabina ngadto sa mga anak.

“Kayong mga lalaki huwag nyo’ng kalimutan ang responsibililad nyo isip mga tatay sa inyong pamilya. Ngano man importante? Kasi base sa among statistics sa gobyerno, kanang naga-apil sa gangster-gangster, naga-apil sa mga droga, kanang mga badlongon, ang kasagaran ana mga bata gikan sa pamilyang nagbulag,” pasabot sa gobernador sa dili maayong resulta tungod sa panagbulag sa magtiayon.

Sa tanang paglibot sa Serbisyo Caravan, ang tanang gisul-ob sa mga gikasal gihatag nga libre ni Gobernador del Rosario lakip na ang wedding cake gawas pa sa giapod-apod nga regalo.  

Ang libreng kasalan ng bayan maoy usa sab ka paagi nga mahimong legal ang kaminyoon sa mga nagtipon ug malakip nga mga benepisyaryo ang asawa ug mga anak sa programa sa gobyerno sama sa libreng Philhealth, 4Ps ug uban pa.

DavNor News