SA KAHADLOK nga dunay daotang mahitabo kaniya, misurender ang usa sa grupo sa mga tulisan ngadto sa kapolisan.
Sumala ni Tagum City Police Office (TCPO) OIC-Chief PSupt Philip Jefferson Ayban, unang mitahan sa iyang kaugalingon si Peter Riña didto sa Laak Municipal Police Station ug gitahan ra usab kini sa TCPO nga gi-presentar sa media Myerkoles, Agosto 29, 2018 sanglit ang mga krimen dinhi nahitabo sa Tagum. Dugang gibutyag sa OIC hepe nga ang suspetsado nakahimo na sab ug krimen didto sa Leyte ug seguradong patong-patong nga kaso ang atubangon niini.
Bisan sa pag-ubos sa gidaghanon sa krimen sa Tagum City nga adunay 2,127 Enero-Agosto 2017 kung itandi sa Enero-Agosto 2018 nga 1,127, kahinumduman nga niadtong miaging semana lamang, tulo gayod ka sunod-sunod nga tulis sulod sa 9 ka oras nga gikaingon pulos hinimoan sa grupo sa suspetsado ang nahitabo.
Sanglit ang TCPO nga duna lamang sobra 130 ka polis nga nadestino sa syudad kung itandi sa iyang populasyon nga miabot ug 259,444 sumala sa Philippine Statistics Authority (PSA) Census on Population Agosto 1, 2015, plano karon sa kapolisan uban sa Local Government Unit nga magbutang ug GPS communication system diha sa mga patrol cars.
“Malaking tulong yan para ma-maximize natin yung tropa kung saan sila ma-strategically located. Pag may mga crime na nangyari ma-respond natin immediately as soon as possible para mabigyan natin ng aksyon. GPS is one tool,” matod ni PSupt Philip Jefferson Ayban nga miangkon nga mas importante gayod hinuon ang taas nga morale sa tropa nga andam moserbisyo.
“Importante pa rin dyan yung human morale natin. Kung low morale yan hindi pa rin siya magtatrabaho, idi-disregard pa rin yung mga utos kung wala siyang willingness; puso pa rin ang tinitingnan dyan kung magtrabaho,” padayong pahayag sa OIC hepe nga miangkong TCPO caretaker lang siya sulod sa 45 ka adlaw gawas kung adunay extension.
Wala gibutyag ni PSupt Ayban kung kanus-a nila madakpan ang duha pa ka kaubang tulisan ni Riña hinuon positibo kini nga dili na madugay ila kining masikop gawas kung mosurender sab aron dili mameligro.
Gibutyag sab ni City Mayor Allan Rellon nga makasalig ang TCPO sa iyang suporta labot sa GPS communication system nga kanhi gigamit na sa miaging hepe sa Tagum City. Magsilbi sab kini nga pang “check” sa mga polis kung nagpatrolya ba gayod.
“Makita tanan, naga-blink ang mga patrol cars, makita asa nga barangay. So kung halimbawa naay tawag duol sa Ilocandia, so makita niya kinsa’y pinakaduol nga patrol car tawagan niya, paspas nga response. Second kung gusto pod niya i-check kung nagtrabaho ba, usahay mokalit siya’g tawag, testingan asa,” pasabot ni Mayor Rellon.
Bisan pa sa pagsurender sa suspetsadong tulisan, giklaro sa TCPO nga ilang pakusgan pa ang police visibility ilabina sa mga estratehikong lugar sa syudad.
