4-anyos DavNor Bahay Pag-asa deretso Level 2

DERETSO LEVEL 2 ang accreditation sa upat ka tuig nga DavNor Bahay Pag-asa nga nahimutang sa New Corella, ang balay-dangpanan sa ubos 18 anyos nga mga Children in Conflict with the Law (CICL) dinhi sa probinsya.

Sumala sa RA 9344 o “Juvenile Justice Welfare Act,” ang matag probinsya ug highly urbanized city magtukod ug Bahay Pag-asa nga kadangpan sa mga kabataan nga dunay kalapasan sa balaod aron matabangan mareporma ug mahimong mapuslanon sa katilingban.

Sa iyang ika-upat nga anibersaryo Byernes, Agosto 31, gipahalipayan ni Department of Social Welfare Regional Director XI Mercedita Jabagat ang mga lalaki ug babaye luyo sa nakab-ot nga Level 2 accreditation.  

“Just recently we award the accreditation to the province of Davao del Norte Bahay Pag-asa for Level 2. This is the first Bahay Pag-asa in the Philippines nga na-accredit deretso pa gyod Level 2. Congratulations sa nag-manage, the head and staff, sa PSWDO Arlene Semblante, ang board members and of course ang pinakataas si Governor Anthony del Rosario,” pagtimbaya sa DSWD RXI Director labot sa nakab-ot nga accreditation nga balido sa upat ka tuig.

Bisan pa sa bag-ong kalamposan, gidasig ni DSWD Director Jabagat nga kab-oton ang Level 3.  

“Ang atong provincial administrator nag-aim na pod. . nganong di dayon ta magpa-Level 3. That’s the highest sa atong accreditation. Ang kulang vehicle, driver, and CCTV. Aware sila, ang atong center head unsa pa’y kulang para Level 3. And that’s a challenge to the Province particularly to the staff nga makaabot gyod ta ug level 3,” pagdasig ug hagit sa DSWD Director.

Gikalipay ni Gobernador Anthony del Rosario nga sa pag-estar sa mga residente sa DavNor Bahay Pag-asa, pipila kanila nakadawat ug sertipikasyon ingong mipasar sa Alternative Learning System (ALS) ug sa mga Skills Training.

“As we know basta gani minors di sila pwede ipakulong and that’s why they are admitted here in the hope that they will be rehabilitated and hopefully you will go out back in society and be productive citizens. Hangyo nako pag-abot sa panahon hawa namo dinhi, I hope you continue to become good people in your respective communities,” pagdasig ni Gob AGR sa mga batan-ong residente uban ang komendasyon ug pasalamat sa mga paningkamot nga gipangunahan ni PSWDO Arlene Semblante sa Level 2 Bahay Pag-asa.

Mihangyo pa ang Gobernador sa mga ginikanan nga tabangan ug padayong giyahan ang ilang mga anak.

“Sa mga parents sa ating mga residents. . Please, please take care of your children. Please guide them so that they will continue their path to be good citizens, kay kamo man gyod ang mag-giya sa ilaha, kabalo ko dili sayon. I hope you will guide them into the future,” hangyo-pagdasig ni Gob AGR sa mga ginikanan nga presente sa maong okasyon.

Ang ikaupat nga anibersaryo sa DavNor Bahay Pag-asa gitambongan sab sa mga department heads sa DavNor Kapitolyo gipangunahan ni probinsyal administrador Samson Sanchez, board member Vicente Eliot, lokal nga mga opisyales sa New Corella nga gipangunahan ni Mayor Rhodora Alcoran ug sa mga “friends” sa Bahay Pag-asa.


 

More Davnor Updates at

DavNor Karon

 

DavNor News