GIDEKLARA ingong mananaug sa Rehiyon XI ug national semi-finalist alang sa Civil Service Commission 2018 Search for Outstanding Public Officials and Employees (CSC PAGASA Award) ang Davao del Norte e-Governance team.

Atol sa convocation Lunes, Septyembre 3 dungan sa pagbukas sa pag-obserbar sa probinsya sa Civil Service month, gipahibalo ni RXI Human Resource Specialist Reilee Jill Villanueva ang nadawat nga pasidungog sa DavNor e-gov team samtang naghatod sab sa mensahe sa provincial CSC Field Office director.

“The Davao del Norte e-governance team was declared regional winner and semi-finalist to the 2018 Search for Outstanding Government Employees. You have not achieved all these had you not individually and as a team manifested the values of Lingkod Bayani: Maka-Diyos, Makatao, Makabayan.  You have proven that you can decide and worked together in building a relevant and responsive provincial government. You have a new organizational structure and highly qualified workforce that can address the increasing demands of local people for excellence in public service,” matod ni Ms. Villanueva.

Matod ni Provincial Human Resource Office Asst Department Head Edwin Palero ug kasamtangan nga e-gov project manager nga dunay nakita sa sistema sa DavNor nga nakapakombinsir sa CSC validating team.   

“Ilang nakita nga ang atong mga Human Resource Management processes naa gyod na’y mga Resource Information System. . Part pod sa ilang pag-qualify kung giunsa pag-organize, giunsa paghimo, giunsa pag-sustain ang maong program. Di man gud na siya paghimo lang; kung unsaon pod siya i-implement, nga nadawat sa mga mogamit, kay ang mogamit ani mga empleyado. So mangutana sila gigamit ba? nagamit ba? Nakatabang ba?” matod ni Mr. Palero.  

Aron gyod maseguro kung tinuod ba nga mapuslanon, mikuha pa ang e-gov team ug batid nga tawo aron mohimo ug pagtuon labot sa ownership, acceptance ug positibong epekto sa paggamit sa HRS diin nahibaw-an ang dakong bentaha sa dihang gigamit ang sistema.

Kagahapon, Myerkoles Septyembre 5, ang delegasyon gikan sa PLGU ComVal Province, General Santos City Water District, PLGU Davao Oriental ug ang Department of Transportation Caraga Region nangabot alang sa benchmarking.

“Kadtong naay gi-held sa Davao nga HR symposium nakita sa booth sa Davao del Norte, na-amaze mi sa ilang HRS nga kanang pwede bitaw nimo sa app na lang i-download, unya didto na ka mag-approve, dis-approve. Sa amo man gud submit ka’g papel, ana ba. So gi-propose namo sa among sir nga mag-benchmark mi aron pod puhon-puhon ing-ana pod mi,” matod sa Accountant sa DOTr Caraga Region, Butuan City nga apil sa nag-benchmark.

Gawas sa HR nga sistema, ang e-gov team nagpanday sab sa Volunteers Submitted for Reformation (VSR) information system alang sa mga misurender nga biktima sa illegal nga droga, procurement processes, AGR-IMS lakip na ang bag-ong information system sa paghatod sa BEST PEOPLE Serbisyo Caravan.

DavNor News