PAREHAS sa ubang hospital sa gobyerno, sobra-sobra ang gidaghanon kay sa angayan lang unta dawaton nga mga pasyente.

Kini ang nahitabo sa Carmen Zone District Hospital (Panabo City, Carmen, Braulio E. Dujali ug Sto. Tomas), ang usa sa tulo ka mga hospital nga gipanag-iya ug gipadagan sa probinsyal nga panggamhanan sa Davao del Norte nga aduna lamang 25 bed-capacity apan miabot ug 58 ka pasyente ang gi-admit atol ning pagsulat.

Tungod kini kay dili pwede balibaran ang mga nanginahanglan ug medikal nga tabang ilabina ang mga ubos sa kahimtang sa kinabuhi.  

Matod ni Ms. Eliza Andin, CPA, provincial department head sa DavNor Provincial Economic Enterprise Development Office (PEEDO) nga nagdumala sa tulo ka zone district hospitals (Kapalong, Carmen ug Samal), nga ang ilang average daily census moabot ug 58 ka na-admit nga pasyente, sobra 200% sa ilang bed-capacity nga 25 lamang.

Apan bisan pa sa maong gidaghanon gipaneguro sa mga personahe sa Carmen Zone hospital nga madawat ang gikinahanglang serbisyo sanglit kompleto sila sa mga consultants, mga doctor ilabina ang DavNor parmasya nga andam moserbisyo sa nanginahanglang kabos nga Dabaonon.

Sa mensahe ni Gobernador Anthony del Rosario alang sa ika 19 nga anibersaryo sa Carmen Zone hospital, gikomendahan niini ang paghago sa mga lalaki ug babaye luyo sa peligro tungod sa lain-laing sakit nga ilang gi-atubang.

“Dako kaayo mo ug bahin sa kauswagan sa atong probinsya. Kamo ang ga panerbisyo sa katawhan sa panahon nga aduna silay bation nga sakit ug problema sa kalawasan. Apil pa ani ang inyong pag giya kanila sa mas himsog nga kinabuhi. Your service has helped trickle down the habit of valuing health to the grassroots and established our strong efforts in addressing the health requirements of our Dabaonon people. Hazardous ang inyong trabaho nga adlaw adlaw ma expose sa sakit. To the people behind Davao del Norte Carmen Zone Hospital, akong hinaot nga di mo kapuyon sa paghatag og maayong serbisyo sa katawhang Dabaonon. I commend you for the collective efforts as we strive hard to fulfill our goal to provide optimum health through our programs,” komendasyon ni Gob AGR sa mga personahe sa Carmen Zone hospital nga gihatod pinaagi ni Executive Assistant Rolly Yap.

Niadtong Martes, Septyembre 4, simpleng gisaulog sa Carmen Zone District Hospital ang iyang ika-19 nga anibersaryo uban sa tema nga “Growing Stronger, Growing Deeper, Reaching Higher.”

DavNor News