GIKAN sa kabukiran ngadto sa kadagatan, wala kini makababag sa BEST PEOPLE Caravan of Services nga dad-on ang sobra otsenta ka serbisyo ngadto sa isla sa Talicud, ang pinakalayo nga dapit sa Davao del Norte.

Sayo sa alas 2 sa kaadlawon Lunes, Septyembre 10, migikan na ang ubang departamento aron mapahiluna ang paghatag ug serbisyo sosyal, medical, legal ug daghan pang uban alang sa mga residente sa upat ka barangay Sta. Cruz, Dadatan, Cogon ug Linusotan. Wala hinuon pugngi ang ubang barangay nga moadto aron makapahimulos sa mga serbisyo.  

“Karon pa gyod nato natagamtaman ang ing-ani nga serbisyo nga gipanghatag dire sa atong isla. Daghan kaayong salamat sa atong gobernador nga ginatagaan kita ug dakong bili bisan kung nia kita nagpuyo sa malayong dapit sa isla sa Talicud island,” matod ni Sta. Cruz Barangay Kapitan Gomer Dumaran nga didto gipahinabo ang Caravan of Services.

Bisan si IGACOS Vice Mayor Orly Amit nga mao lang ang opisyal sa syudad nga misugat sa caravan of services wala makapugong nga magpasalamat tungod dsa kalisod sa pagdala sa mga serbisyo.

“Dako kaayo namo ning kalipay nga inyong gidala kini nga mga serbisyo dinhi sa Talicud island. Nalipay ko nga gidala ninyo sa pinakalayo sa probinsya ug lisod kaayo moserbisyo dinhi. Ngano? Motabok pa ka ug dagat, lisod moanhi dinhi. Pero bisan sa kalisod nakita gihapon nga walay rason nga dili nila paabton ang serbisyo sa probinsya. Ila na pod gisakay sa ferry boat ang tambal, ang equipment, ang manupihay. Salamat gyud kaayo gob,” matod ni IGACOS Vice Mayor Orly Amit.  

Libre ug walay bayad ang tanang serbisyo sa BEST PEOPLE caravan of services nga nakahatod na didto sa New Corella, Braulio Dujali, Asuncion, Panabo, Carmen, New Corella, Talaingod ug Kapalong.  

“Lisod kaayo kung kamo pa moadto sa Tagum kay dako kaayo’g gasto sa pamilite. Mao nang rason ang atong kagamhanan sa probinsya, kaming tanan nagdesisyon mi nga maghimo ug ing-aning programa para ang mga tao nga nagpuyo sa mga layo nga lugar di na kinahanglan pa mag-adto sa Tagum kay sayang ang kwarta. Mas maayo pa kami ang moadto sa inyoha para dad-on namo ang tanang serbisyo para dili na mo maglisod. Mao na ang tuyo sa BEST PEOPLE Festival of Services,” matod ni Gobernador Anthony del Rosario nga nag-awhag nga pahimuslan ang tanang serbisyo kay wala kini bayad.

Pinaagi sa BEST PEOPLE development agenda, gusto sa presente nga administrasyon nga dalhon gayod paduol ang gobyerno ngadto sa tanang Dabaonon nga nagpuyo sa Davao del Norte ilabina niadtong nagpuyo sa lagyong mga dapit.

DavNor News