BISAN ASA nga mohatod ug serbisyo ang BEST PEOPLE caravan of services wala gayod kalimti niini ang kampanya aron atimanon ang kinaiyahan.

Pinakauna sa BEST PEOPLE development agenda ni Gobernador Anthony del Rosario, ang letrang “B” nga nagkahulogan ug Balanced Ecology, nagtutok aron maatiman ug matabangan ang kinaiyahan nga dili mopadulong sa grabeng kadaot.

Kanunay nagpahigayon ug tree-planting ang DavNor Provincial Environment Natural Resources Office (PENRO) diha sa ilang giila nga barangay sites, school sites, daplin sa suba ug bisan mga natural nga langob aron matabangan ang lugar nga dili mopahawa ang nagpuyo nga mga hayop ug langgam.

Nga gipuy-an sa milyones nga mga kwaknit, ang DavNor PENRO nagpili sa Dadatan Bat Conservation Park sa barangay Dadatan, Talicud island aron tamnan sa halos 140 ka mga kahoy ug prutas.

Bisan kung bakilid ang lugar, miapil ang sobra 40 ka mga magtutudlo sa Sta. Cruz Elementary School (SCES) ug mga opisyales sa barangay nga andam sab mobalik aron atimanon ang gitanom nga kahoy sulod sa upat ngadto unom ka bulan, ang kritikal nga panahon sa pagtubo.

Gawas sa pagtabang nga mamentinar ang palibot sa Dadatan Bat Cave, matod sa mga magtutudlo lakip si Naty nga 51-anyos na, nga gusto nilang mahimong “turista sa kaugalingong isla.” Ang grupo sa mga magtutudlo maoy lumad nga taga Talicud ug nagpuyo sa barangay Sta Cruz apan unang higayon nilang nakita nga dunay langub sa mga kwaknit nga duol kaayo sa ilang gipuy-an.

Mga 140 ka seedlings sa kahoy ingon man mga prutas ang gitanom sa palibot sa langob sa mga kwaknit.

Gawas sa pagtanom ug kahoy, prutas ug mangrove, ang DavNor PENRO padayon sab nga naghimo ug mga adbokasiya pinaagi sa mga simposyum labot sa pagpreserbar sa kinaiyahan.

DavNor News