Ang Anflo Industrial Economic Zone nga gipangunahan sa Anflo Management and Investment Corporation (Anflocor), maoy usa ka 63-ektaryas nga kabahin sa 88-ektaryas nga luna nga ideboto alang sa pag-manufacture, komersyal, agro-industrial, Information ug Communications Technology (ICT) ug ubang ekonomikanhon nga kalihokan.

Ang mga locators (negosyante) nga magbutang sa ilang negosyo dili gayod maglisod sa pagpasulod ug pagawas sa ilang mga produkto sanglit 300-metros lang ang gilay-on niini sa Davao International Container Terminal sa Panabo City nga gipanag-iya sab sa Anflocor.

Labot sa Hijo Special Economic Zone nga nahimutang sa Madaum, Tagum City, kini usab silingan ra kaayo sa Hijo International Port, ang gikaingong pinakadako nga container-handling fleet sa Mindanao, usa ka dakong bentaha alang sa mga locators nga magbutang sa ilang mga negosyo.

Sanglit ang Davao del Norte maoy usa ka agrikultural nga probinsya, katuyoan usab sa Investment Forum nga ikampanya ang pagsagop sa estratehiya nga ‘economic corridor’ ngadto sa mga munisipyo aron ang ilang mga produkto mahimong mailhan. Ang Davao del Norte maoy kabahin sa Southern Mindanao Development Corridor nga naglaum nga mapauswag ang imprastruktura, pagkadugtong sa mga lugar, pagpadaghan sa oportunidad sa panarbaho sa Mindanao alang sa balance ug katibuk-ang paglambo niinil.

Gilauman sa DTI-DavNor nga mosobra pa sa ilang gidahom nga 40 ka mga partisipante ang motambong sa Forum on Economic Zone/Corridor Development in Davao del Norte sanglit ang ilang imbitasyon gipaabot sa tanang interesadong partisipante ngadto sa mga sektor sa pribado ug gobyerno. (pioDavNor)