DavNor, DVGA nagkasabot sa ‘gulayon’

NAGKASABOT ang probinsyal nga panggamhanan sa Davao del Norte ug Dynamic Vegetable Growers Association (DVGA) alang sa panginahanglan sa mga gulayon.

Ang kasabotan nga gipirmahan Myerkoles, Septyembre 19, 2018 makahatag ug kaayohan sa bahin sa probinsya ug asosasyon sa mga mag-uuma nga mao ra sab ang direktang tigbaligya sa ilang abot.

Mapasalamaton kaayo ang DVGA sa tabang nga nadawat gikan sa DavNor pinaagi sa Provincial Agriculture Office (PAGRO) kay dili na sila maglisod pagpangita ug “buyer” ilabina kung mag-dagsa ang gulayon sa merkado. Gawas pa sa husto nga presyo, malikayan sab ang kadaot sa ilang produkto sanglit dili na kini mapondo ug dugay.

“Ang Dynamic Vegetable Growers Association usa ni siya ka asosasyon sa gagmay nga mga vegetable farmers. Dako kaayong pasalamat sa Provincial Agriculturists Office,” matod ni Rengie Dordas, ang chairman.   

Makaayo ang presko nga mga gulayon alang sa mga pasyente sa tulo ka district hospital sa DavNor diha sa Kapalong, Carmen ug Samal ug bisan sa mga residente sa Luntiang Paraiso Regional Rehabilitation Center ug mga ‘boarders’ sa DavNor Provincial Jail.

“Tinuod kaayo ang giingon nga mas makulay ang buhay sa gulay. Ang pagkaon sa gulay matag adlaw susi sa maayong panglawas ug sa mas taas nga kinabuhi. Atong ginaduso karon sa atong mga barangay, mga eskwelahan ug komunidad ang pagpananum sa gulay aron dunay makuhaan ug libre, sustansyado nga pagkaon sa atong katawhan. Kini ang atong tubag sa pagsulbad sa malnutrition problem ug usab aron atong makab-ot ang kasigurohan sa pagkaon sa atong lalawigan,” matod sa mensahe ni Gobernador Anthony del Rosario nga gihatod ni Executive Assistant Roger Baay.

Gawas sa pagdasig sa pagpananom, hugtanong mitabang sab ang DavNor aron dali nga mabaligya ang mga produkto sa mga mag-uuma sa husto nga presyo.  

“We need to help our vegetable farmers and growers in the most important aspect of marketing their products. I am happy that the Dynamic Vegetable Growers Association has responded. This marketing agreement that we shall be signing this morning is a testament of our undying support to our farmers and enduring commitment to poverty alleviation and food security. Akong ipasalig ang pagkamatinud-anon sa Probinsya sa pagpatuman niini nga kasulatan. Ako manghinaut sa inyong padayong kadasig, kakugi ug pagtambayayong, aron sa pag-usbaw sa produksyon aron masiguro ang saktong nutrisyon ug pagkaon alang sa atong katawhan,” pasalig ug panghinaut sa gobernadora.

Atol sa pinirmahay, gibutyag ni PAGRO AMAIDD Division Head Edgar Cabrera, nga dili lang ang asosasyon sa gulay ang gitabangan nga maporma hinuon apil na ang mga asosasyon sa cacao, cavendish ug industriya sa humay samtang gikompleto pa ang asosasyon sa mangga ug tighimog tsokolate.  

Ang DVGA nahimong tig-suplay na sab ug mga gulayon sa Davao Regional Medical Center (DRMC) sa Apokon, Tagum City ug ComVal Provincial Jail.


 

More Davnor Updates at

DavNor Karon

 

DavNor News