PAHUWAY sa trabaho ug palayo una gikan sa basakan ug umahan ang mga Agricultural Extension Workers (AEWs) sa Davao del Norte alang sa ikaduhang asembliya didto sa RDR Gym, Martes, Septyembre 18, 2018.

“Ato sa hatagan ug importansya ang atong kaugalingon. . Gawas sa medyo hago nga trabaho, risky pa gyod. Posible masugatan nato ang mga mananap nga malaa-- iro, bitin, mga banakon. Kabalo ta unsa ang mga hardships atong naagian sa field, ulan ug init kita nga mga AEWs. We will take sometimes a break, a moment of enjoyment kauban ang atong mga kaubanan,” matod ni Engr. Ronald Montepio, ang presidente sa Davao del Norte chapter League of Agricultural Development Extentionists Region XI (LEADER XI) nga naghatag sa katuyoan labot sa ilang panagtapok.

Giila pag-ayo ni Gobernador Anthony del Rosario ang dakong natampo sa mga AEWs ilabina sa kasamtangang krisis sa bugas.

“Mapasalamaton kita nga wala kaayo nato mabati ang krisis sa bugas. Gani, nagpadayon nga lig-on ang atong industriya sa agrikultura bisan sa daghang hagit sa panahon.  Ug kini atong dakong utang sa atong mga kugihan nga mga mag-uuma ug inubanan sa atong mga madasigon nga mga lumilihok, sama sa atong mga agriculturists ug mga agricultural extension workers,” matod sa gobernador nga gihatod ang iyang mensahe pinaagi ni Nemeses Nuñez.

Sanglit ang mga AEWs ang kanunay makaestorya sa mga mag-uuma, gisugyot pa gani sa gobernador nga hubaron diha sa masabot nga pinulongan ang mga termino aron mapadapat sa ilang pagpanguma. 

                 

“Lisod kayo pasubayon ang atong mga mag-uuma kung dili sila tarong nga mapasabot sa mga bag-ong pamaagi ug mga teknolohiya sa pagpanguma. Ing-ini kabug-at ang papel sa atong mga agricultural extension workers. Aron mapasabot, kinahanglan nga hubaron pag-ayo ang mga termino ug mga resulta sa research studies. Kinahanglan ang pasensiya ug determinasyon. saludo ako sa inyong katakus ug padayong kakugi sa inyong trabaho,” pagsugyot ni gob AGR alang sa kasayon sa mga mag-uuma.

               

Sobra 70% sa ekonomiya sa Davao del Norte napalihok tungod sa agrikultura nga gitutokan pag-ayo ni Gob AGR alang sa kalamboan ug ilabina sa seguridad sa pagkaon.

Nakig-partner sab ang probinsyal nga panggamhanan sa Philippine Crop Insurance Corporation (PCIC) aron maseguro ang mga pananom, kahayopan, kagamitan ug bisan ang mag-uuma mismo pananglit adunay kalamidad.

“Atong nakita ang bunga sa inyong paningkamot kay padayon ang maayong abot sa atong mga umahan sa probinsya mao nga wala kaayo kita naigo sa rice crisis. Laumi ninyo nga padayon ang atong pagtutok sa mga programa ug proyekto sa Probinsya alang sa agricultural development ug food security,” pasalig sa mensahe ni Gobernador AGR.

Atol sa ikaduhang asembliya, gihisgotan sa mga AEWs ang paghiusa sa ilang mga tingog aron mo-arang-arang ang kahimtang sa panarbaho ug naghimo ug team-building pinaagi sa mga dula.

DavNor News