Serbisyo Caravan gihatod na pod sa New Corella

GIHATOD na pod ang BEST PEOPLE Festival of Services didto mismo sa Poblacion, New Corella, Davao del Norte, sa ikaduhang higayon.

Kahinumduman nga didto sa Limbaan, New Corella ang pinakaunang Serbisyo Caravan niadtong Pebrero 2018 ug ubang nahilit nga mga barangays Cabidianan, Macgum, Sto. Niño ug Suawon.

Sa unang paglibot upat lamang ka adlaw ang mga serbisyo apan gihimo na kini nga lima sanglit katuyoan sa Serbisyo Caravan nga ipaduol gayod ang halos 100 lain-laing serbisyo sa DavNor Kapitolyo kauban ang mga ahensya nasyonal sama sa LTO, SSS ug ilabina ang mga serbisyo sa Department of Health (DOH).

“Karon sa opening sa atong festival of services nga gihatod sa provincial government headed by Governor AGR del Rosario, lima ka adlaw, kay gusto ni Governor AGR nga ang mga services, dinhi gitunol na niya ang mga serbisyo,” matod ni New Corella Vice Mayor Joel Jumawan nga nag-abi-abi sa ikaduhang paglibot sa Serbisyo Caravan sa ilang lungsod.

Mapasalamaton kaayo si Mayor Rhodora Alcoran sa walay hunong nga suporta ngadto sa New Corella.

“Ania karon dinhi ang tibuok probinsya sa Davao del Norte aron sa pagtunol ug mapaduol ang serbisyo ngadto sa katawhan. Tabang kini sa katawhan aron maugmad ang inyong katakos ug kaugalingon. Salamat Governor Anthony G. del Rosario sa imong pagpangga ug walay puas nga suporta sa katawhan sa lungsod sa New Corella. Sayod ko nga dili hitupngan ug bugas ang tabang ug katakos nga imong gihatag sa lungsod. Ug labina sa mga umaabot pa nato nga mga proyekto nga imong giandam for 2019 worth 500 million, dugang proyekto sa lungsod sa New Corella,” pasalamat ni Mayor Alcoran nga naatol sab ang pagbukas sa Serbisyo Caravan sa iyang ika-50ng kasaulogan sa adlaw’ng natawhan.  

Gawas sa pagpaduol sa mga serbisyo, katuyoan sab sa Festival of Services nga direktang mapaminawan sa Gobernador ang gustong programa nga dawaton sa mga lumulupyo. Sanglit wala makaabot sa opening program, girepresentahan ni kanhi gobernador Rodolfo del Rosario si Gob AGR.

“Atong pasalamatan si Governor AGR sa iyang programa nga ginapaabot dire kaninyo, it will be a whole week 5-day caravan ng services to be extended here by the whole province. Ug ako bilang consultant ni Governor AGR nag-apil-apil na pod,” matod sa kanhi gobernador nga puno sa kadasig luyo sa iyang panuigon.  

Gikan niadtong Pebrero, 2018, duolan na sa 50,000 ang naserbisyohan sa paglibot sa Serbisyo Caravan.


 

More Davnor Updates at

DavNor Karon

 

DavNor News