Mga buntis sa New Corella libreng giserbisyohan

DIDTO na pod sa lungsod sa New Corella libreng gi-serbisyohan ang halos usa ka gatos nga mga buntis sa ikaduhang adlaw sa BEST PEOPLE Serbisyo Caravan.

Tanang health services para sa mga mabdos sama sa dental, laboratory, OB gyne ug uban pa kompleto nga gihatag alang kanila.

Gidayeg sa Department of Health ug sa Provincial Health Office ang pag-anha sa mga buntis sanglit aduna kini “malasakit” sa ilang kaugalingon. Gikaingon nga ang isa ka babae nga magbuntis, labi na’g manganak na, mora’g “naa na sa lubnganan ang isa ka tiil” nga angay lamang gayod nga makadawat yg hustong pag-atiman ang bata bisan kung sa tiyan pa.

Ug bisan ang Philippine Army miapil sa paghatag sa ilang serbisyo ngadto sa mga buntis.  

 Si Mrs. Grace Lynden Intong nga taga Purok 11, Poblacion, New Corella mapasalamaton sa daghan kinahanglanon kaayo nga mga serbisyo para sa buntis ilabina kay daghan siya’g nakat-onan labot sa pag-atiman sa bata gumikan sa pagtambong sa Buntis Congress nga gihimo para kanila.

“Libreng mga check-up, dental, laboratories, more na-learn about sa bata ug sa pagbuntis sa inahan, dugang impormasyon, masabtan nimo aron ang bata pod healthy sa imong sabakan. Makatabang ni siya. Salamat jud kayo gov, kay kami nga naa sa layo makahatag jud ni ug libreng serbisyo labi na sa laboratories, mga galastohon maka-save mi. Usa pa pod duol ra sa amoa. Salamat kaayo,” matod sa batan-ong buntis nga si Mrs. Grace.

Si Michelle Gumapac nga taga Purok 5 Durian sa barangay Del Pilar, New Corella mapasalamaton sab sa nadawat libreng serbisyo, tambal ug mga bitamina bisan mga gamit alang sa pagbuntis.

“Daghan siya’g ikatabang sa mga buntis sama nako tungod kay nahatagan mi ug tugon kung unsa among gipangbati karon, sama sa pre-natal, check-up sa ngipon, sa dugo, sa ihi, labi na pod kay naay libreng maternal kit para sa amoa. Magpasalamat ju’g dako kay dako siya’g tabang sa amoa,” pahayag ni Michelle.

Katuyoan sa presente nga administrasyon ni Gobernador Anthony del Rosario pinaagi sa iyang BEST PEOPLE development agenda nga dalhon paduol ang gobyerno ngadto sa tanang Dabaonon nga nagpuyo sa Davao del Norte ilabina niadtong nagpuyo sa lagyong mga dapit.

Libre ug walay bayad ang tanang serbisyo sa BEST PEOPLE caravan of services gikan sa probinsyal nga panggamhanan nga ikaduha na kining gihatod sa New Corella.


 

More Davnor Updates at

DavNor Karon

 

DavNor News