SERBISYO CARAVAN SA NEW CORELLA: Mga titser nag-training aron sab mo-training

PUNO SA PAGPASALAMAT ang duha ka titser nga nakadawat ug pagbansay diha mismo sa ilang tugkaran sa tuyo nga sila sab makahimo pagbansay sa uban.

Ilawom sa BEST PEOPLE development agenda, katuyoan gayod ni Gobernador Anthony del Rosario nga ipaduol ang mga serbisyo sa DavNor Kapitolyo aron mapakusog ang katakos ug molambo ang kahanas sa usa ka Dabaonon. Katuyoan sab nga ipaduol ang halos usa ka gatos lain-laing serbisyo medikal, legal, sosyal ug espirituwal Serbisyo Caravan aron ang publiko makadaginot ug kwarta, panahon ug kahago.

Sa paglibot, sobra na 50,000 ka Dabaonon ang nakadawat ug libreng serbisyo way labot sa mga mananap.

“Miapil ko ani dili tungod para sa akong kaugalingon, para ni sa akoang estudyante because I am handling special education children, kanang mga children with disability. Unya ang akong gi-handlelan kadtong sa transition program nila. So kadtong mga bata nga dili kakaya mo-pursue ug college or high school, mao na ni among i-train sa ilaha nga mag-manicure para naa sila’y panginabuhian nga panglahutay. Mao ni siya among purpose nga miapil mi diria,” matod ni Ma’am Mary sa New Corella Central Elementary School (NCCEES).

Gihisgotan ni Titser Mary nga “the best” ug “serbisyong totoo” gayod ang Serbisyo Caravan.

“The best talaga kay di na mi maghago ug asa mi moadto kay naa na gyod sa among tugkaran kay gihatod ni Governor ang serbisyong totoo,” pahayag sa magtutudlo sa special education para sa mga bata nga adunay kabaldahan sa panglawas (PWD).

Alang sab kang titser Zeny, ang programa maoy “talagsaon” alang kaniya.

“Makatipid ko. Mao na akong purpose. Kining programa ni gob very excellent gyod siya. Once in a blue moon sa among kinabuhi mao nga nag-apil-apil pod mi. Giganahan jud mi one hundred one percent,” pahayag ni Maam Zeny samtang nagpulihanay ug “hands-on manicure” ni titser Mary.

Apan ang dako nga katuyoan ni Maam Zeny mao ang pagtudlo sa iyang mga ka-purok.

“Pwede pod nako itudlo sa taga purok namo, nga matudloan nako sila nga ing-ani ning pedicure,” padayag sa maestra sa NCCEES ilabina nga ang tanan nag-training makadawat ug starter kits.

Mapasalamaton sab si SPO3 Raquel R. Salinas sa New Corella Police Station nga apil sila nga naghatag ug serbisyo publiko ngadto sa mga tawo.

“Nagpasalamat jud kaayo mi especially makita man nato daghan kaayong tao karon sa BEST. Nagpasalamat mi kay instead moadto pa ang tao sa Tagum para mo-avail aning mga serbisyo gidala gyod dire. Ang gikatampo pod sa PNP ang maghatag ug libreng police clearance. Kaning libreng police clearance ma-avail ni basta naa lang silay mga requirements nga madala. Libre ni siya, walay bayad kay gi-libre sa local government,” matod ni SPO3 Salinas nga nanawagan pa nga pahimuslan ang libreng serbisyo.

“Sa taga New Corella kung kamo nanginahanglan ug serbisyo dili lang sa police clearance ug uban pa sama sa medical examinations, LTO ug uban pang serbisyo, dali lang mo sa New Corella Central Elementary School para maka-avail mo ani nga serbisyo gidalit kaninyo sa Local Government of New Corella and the province of Davao del Norte thru sa BEST nga programa sa atoang goberno,” pagsibya ni SPO3 Salinas.

Usa ang mister ni Lolita Anilao nga taga San Juan, New Corella sa 426 nga nakakuha ug Student Permit (SP) sa LTO alang sa pag-drayb ug sakyanan

“Salamat, dako kaayo ug kalamboan sa mga katawhan nga nag-anhi dire. Malipay ug dako ang mga tawo kay ang wala naka-kuan ug mga LTO bisan akong pares, naningkamot siya mao na’y iyang gi-follow-up aron maka-kuan kuno siya’g SP,” pasalamat ni Lolita.

Lima gayod ka adlaw ang Serbisyo Caravan sa New Corella nga mahinamon nga gihulat ang Kasalan ng Bayan.


 

More Davnor Updates at

DavNor Karon

 

DavNor News