LAING 93 ka magtiayon nga nag-ipon-ipon lang sulod sa daghang tuig ang nahimong legal dihang nagpakasal sa libreng Kasalan ng Bayan nga subling gihatod sa BEST PEOPLE Serbisyo Caravan didto sa New Corella atol sa ikalimang adlaw sa Festival of Services, Byernes, Septyembre 28.

Kahinumduman nga niadtong Pebrero 19-22 ning tuiga, unang gipahigayon ang libreng Kasalan ng Bayan hatod sa BEST PEOPLE Serbisyo Caravan alang sa mga residente sa barangays Limbaan, Cabidianan, Macgum, Sto Niño ug Suawon diin 43 ka magtiayon ang naghimong legal sa ilang pagpuyo-puyo.

“Sa among mga festival of services ang last day naa gyod ni Kasalan. Ang tuyo ani para mahimo na mong legal. Kay ang uban man gud mga benepisyo sa gobyerno dili maapil ang imohang asawa ug anak kung dili mo legal mag-asawa. So karon na-legal na mo wala na’y problema,” pasabot ni Gobernador Anthony del Rosario (AGR) sa kaayohan sa legal nga kaminyoon.

Gihisgotan ni Gob AGR ang pila ka mga benepisyo nga angay madawat sa legal nga magtiayon.

“Ang mga Philhealth ninyo pwede na magamit ug ang uban pang benefit gikan sa kaulohan kanang mga programa sa 4Ps. Ang uban man gud diha basta dili pa asawa nga legal maglisod manguha ug benepisyo gikan sa gobyerno. Mao na ang usa sa mga rason nganong naa ta’y ginahimo Kasalan ng Bayan kada Festival of Services.   

Ang magtiayon nga 67 ug 65 anyos anyos nga si Mr. Mosquito ug si Mamerta maoy usa sa 93 ka paresan nga libreng gikasal.

“Kay bag-o pa man nagka-uyab. Maayo ni siya moatiman, inig-uli nako gikan sa trabaho,” rason ni Mr. Mosquito nga midesisyon magpakasal bisan pa kung senior citizens na sila.

Ang libreng Kasalan ng Bayan maoy usa lamang sa halos usa ka gatos nga mga serbisyo nga gihatod sa Festival of Services matag libot niini sa mga LGUs sa tibuok probinsya.

Sukad sa pagsugod niadtong Pebrero 2018, nakaserbisyo na kini ug sobra 50,000 ka mga tawo ilabina ang serbisyo panglawas, gawas pa sa sobra 106,000 lain-laing hayop nga nakadawat ug pag-atiman

DavNor News