GIILA NGA “Huwarang Pamilya” sa probinsya ug Rehiyon XI si Mr. Jemie ug Maribeth Salas ug mga anak nga taga Barangay Kipalili, San Isidro, Davao del Norte.

Gawas sa pamilyang Salas, ang matag LGU duna sab mga Huwarang Pamilya nga tanan benepisyaryo sa 4Ps nga programa nga gidayeg pag-ayo ni Gobernador Anthony del Rosario (AGR) tungod sa ilang paningkamot luyo sa kalisod aron lang mapabiling nahiusa ug lig-on ang ilang panimalay.  

“Kamo gapamatuod nga dili babag ang kawad-on sa kinabuhi para mapalig-on ang pamilyang Pilipino. Hinuon, nagsilbi mo isip usa ka maayong ehemplo sa tanan. Ilabi na sa paghatag og dakong pagtagad sa pag-alima sa relasyon sa matag usa nga miyembro sa pamilya. Nahuptan ninyo ang kalidad sa pamilya nga nagahulagway sa katilingbanong Dabaonon,” pagdayeg ni Gob AGR sa onse ka pamilya.

Apan dili buot sa gobernador nga magpabilin sila sa maong kahimtang.

“Nakita namo nga nakatabang gyud sa inyo ang Pantawid Pamilya Program. Mao kini ang among inspirasyon nga ipadayon og pakusgan pa ang maong programa. Apan, dili namo gusto nga magpabilin mo nga miyembro sa programa, kay kini siya una lang nga lakang sa pagtabang nga mapaayo ang  estado sa kinabuhi.  Lami man paminawon nga aduna ginadawat nga kwarta, apan mas lami sa pamati kung kaya na ninyo isustina ang panginahanglan sa inyong pamilya nga wala gasalig sa uban,” pagdasig sa gobernador.

Sa nahimong probinsyal Huwarang Pamilya dili basta-basta ang ilang paningkamot nga sobra 15 anyos na misaka-kanaug ug lubi ang bana nga si Jemie samtang ang asawa nga si Maribeth ang naghatod sa mga tuba nga gilukdo lang sa ulo.

 “Nagpa-eskuyla ko sa ila bisan unsa ka lisod; kulangan ang akong panggastos. Naa ko’y lubi gamay ako na lang gialalayan ug pananggot. Sa matag adlaw makakuha man gyod ug napulo ka gallon, tag 45 ang gallon. Pasalamat jud ko nga wala gyod ko ka-pamorsyento gigasto sa akong anak. Mao na kada uli nila, kada Sabado ako gyod silang tapokon nga eskwela jud mo, kutob sa akong mahimo mokatkat ko’g lubi. Kay inyoha ra ni. Dili ko gusto nga mapareha mo sa akoa,” pahayag ni Jemie.

Si Maribeth sab ang tiglukdo sa ginalon nga tuba aron ihatod sa mga tindahan.

“Sa una wala pa mi motor, ako’y tiglukdo. Maglukdo ko ug lima ka gallon ihatod sa pikas sitio Alegria. Pag-uli mamahaw; lukdo na pod ug tuba ihatod sa sentro sa barangay Kipalili kay kaluoy sa Diyos si Jemie makalikom man siya kada adlaw naay onse ka gallon, naay tag napulo ka gallon. Ngadto, akong anak nahimo nang maestra, siya’y nidesisyon nga mokuha ta’g motor aron di na ka magsige’g lukdo kay ma-stress,” pahayag ni Maribeth. 

Mapasigarbohon kaayo ang ilang tulo ka anak nga si Jemarie, Jebeth ug Jemalyn tungod sa pagka-mananggiti sa ilang amahan ug pagsakripisyo sa ilang inahan nahimong lig-on ang ilang pamilya.

“Nagpasalamat ko ug dako sa ilahang suporta dili lang sa akoa kung dili sa amoa jung tulo nga ila ming gigiyahan tungod sa maayong kaugmaon,” matod ni Jemarie nga karon usa na ka maestra sa Sawata National High School tungod lang sa pananggot sa iyang amahan ug pamaligya ug tuba sa iyang inahan.

Ang pamilyang Salas mao sab ang giila nga Huwarang Pamilya sa tibuok Rehiyon XI. 

DavNor News