BISAN kung “gipugngan” sa mga opisyales nga dili modawat ug serbisyo gikan sa probinsyal nga panggamhanan sa Davao del Norte, desidido ang sobra usa ka libo nga midugok atol sa pagbukas sa BEST PEOPLE Serbisyo Caravan didto sa Igangon Integrated School, Igangon, San Isidro,  Lunes, Oktubre 8.

Ning panahon sa pagsulat 1,040 na ang natala nga nakadawat sa halos 80 lain-lain libreng serbisyo ilabina ang serbisyo panglawas pinaagi sa Provincial Health Office ug Department of Health. Wala moapil pagserbisyo ang mga municipal health personnel sa lungsod sa San Isidro.   

“Ako nalipay kay nakasuroy ko ug San Isidro. Kining serbisyo nato dili man ni pamolitika. Serbisyo man gyud ning tinuod kay mao man gyod ni ang mandato nato nga mga opisyales nga maningkamot ta nga makahatag ug serbisyo ug pag-alagad sa atong mga lumulupyo dinhi sa San Isidro ug tibuok lalawigan sa Davao del Norte,” mensahe ni Gobernador Anthony del Rosario atubangan sa mga opisyales sa barangay Igangon gipangunahan ni Kapitan Jesse Alcomendras.

Diha hinuon duha ka konsehal sa lungsod ug pipila ka empleyado ang mitambong. 

“Kanang mga partido-partido gihisgotan lang na panahon sa eleksyon. Forty five days ra man nang eleksyon. Magsugod ang kampanya sa Marso hangtod Mayo. Naa pa man ta sa Oktubre. Hinaut unta dili maapektahan ang serbisyo sa katawhan tungod lang sa politika. Dire sa atong probinsya, wala mi nangayo ug card. Ang among ginatabangan, tanan katawhan sa atong probinsya. Wala mi pili-pili unsay kulay na sila, unsay partido nila, basta nagakinahanglan ug tabang, kinahanglan tabangan gyod nato kay mao man ang trabaho nato. Mao gani ta nagpapili isip opisyales. Ako nalipay nga bisan duha lang ang nagtaas ug kamot gikan sa laing barangay, at least naay naka-benepisyo,” dugang pasabot sa gobernador nga nag-awhag sa nanambong nga sultihan ang ilang ka-barangay sanglit lima ka adlaw ang libre nga mga serbisyo.

Bisan ang mga Barangay Health Workers miangkon sab nga gipugngan sila sa paghatag ug serbisyo atol sa Serbisyo Caravan mao nga pipila lang kanila ang nakahimo sa pagtabang sa mga PHO ug DOH health personnel. Mihangyo hinuon nga dili ibutyag ang ilang mga pangalan.

Katuyoan sa probinsyal nga panggamhanan nga ipaduol ang mga serbisyo sa Kapitolyo sukad pa niadtong Pebrero aron makadaginot ang mga residente sa panahon, kahago ug ilabina kwarta.

Gawas sa DOH, kauban nga mihatod ug serbisyo ang nasyonal nga opisina sa PNP nga libreng nag-issue ug police clearance, Land Transportation Office alang sa “SP” ug renewal sa lisensya, Register of Deeds ug uban pa.

DavNor News