Tibuok adlaw serbisyo panglawas para lang gyod buntis

MIGAHIN UG TIBUOK ADLAW nga pag-atiman ang probinsyal nga panggamhanan sa Davao del Norte alang sa kahimsog sa bata ug sa nagbuntis nga Nanay atol sa ‘Buntis Congress’, Martes, Oktubre 9 didto sa Igangon Integrated School, Igangon, San Isidro.

Bisan kung “gipugngan” ang ubang mabdos nga modawat ug serbisyo hatod sa BEST PEOPLE Serbisyo Caravan, nakaabot gihapon ang 50 sa sobra 70 ka mga buntis nga nalista aron maserbisyohan. Ug bisan gani ang ubang Barangay Health Worker nga “gipugngan” sab, miboluntaryo gihapon ang 18 kanila. 

“Ang gusto ni governor nga kompleto, package gyod. . Karong adlawa, special na pod siya nga adlaw para sa mga buntis. . Dili lang kay basta pre-natal naa pa gyod lecture, naa pa gyod gibitbit nga espesyalista nga doktor para motan-aw pod sa inyohang tiyan. Nagbitbit pod mi ug OB kay mao gyoy gusto ni governor nga package gyod. Di na mo moadto sa Tagum para maka-avail ug quality pre-natal care, dinhi gina-adtoan mo,” pasabot ni Provincial Health Officer Alfredo Lacerona sa katuyoan sa BEST PEOPLE Serbisyo Caravan ni Gobernador Anthony del Rosario labot sa pag-atiman sa mga buntis sa probinsya.

Ang tanang buntis nga naserbisyohan gihatagan sab ug libreng maternal kits.

“Kagahapon, general public to siya. Tanang masakiton tambalan, way limit, way gipangita’g kinsa man ka o unsa man ka, basta naa kay gibati tambalan gyod ka. Hatagan gyod ka ug tambal, konsultahon gyod ka. Naa pa gyo’y libreng paniudto. Ugma nakatutok pod mi sa among health advocacy apil kung naa magpatuli. Sa ikaupat ka adlaw, mga tigulang. Maghatag ta’g bakuna, salamin, eksaminon pod kung naay katarata ilang mata. Pagka Byernes, mga bata kay magdala pod ta ug espesyalista para motan-aw sa ilaha. . Kinsa man gud sa atoang mga ginikanan nga dili ganahan nga mahimsog ilang anak. Di ba tanan man ta?” padayong pasabot sa DavNor PHO.

Ingong usa ka nars ug inahan, kanunay presente ang kapikas ni Gobernador AGR nga si Aina del Rosario aron dasigon ang mga buntis.

“Ingong usa ka inahan ug medical professional, kabalo ko kung unsa kalisod ang mahimong usa ka inahan, dili lang physically kung di apil mentally ang kakapoy. Pero ang tanang sakripisyo aron maseguro nga luwas mawala pag-makita nato nga healthy ug happy ang atong mga anak,” matod sa kapikas ni Gobernador Anthony del Rosario nga si Aina del Rosario nga nagpaambit sa iyang kasinatian sa pagpanganak.

Ingong tigpaluyo sa breastfeeding, kusganong gipasiugda ni Ms. Aina del Rosario ang daghang bentaha sa gatas-inahan.

“Ako advocate gyod ko sa breastfeeding kay OK kaayo siya. Akong baby dili masakiton, happy, tapos ang bonding sa mama ug baby lahi ra jud sa bonding sa kanang nag-formula. Kung sa tigulang pa, sa sinauna moingon sila nga mas maluoy ang bata sa inahan kung breastfeed siya. Ma-feel nako na siya,” padayong pagdasig ni Ms Aina nga mao sab ang presidente sa Provincial Women’s Council sa Davao del Norte.

Luyo sa pag-atiman sa anak, gipahinumduman sab ni Ms. Del Rosario nga dili gyod kalimtan sa mga Mama ang ilang mga bana uban ang pagdasig nga sultihan ang ubang aron sab maserbisyohan.

“Ayaw kalimti ang inyong mga bana pod. Aside sa baby syempre alagaan sad nato atong mga bana, kay unya mangita’g laing gwapa. . Kung naa mo’y mga kaila nga mga mabdos sa lain nga mga barangay, ingna ninyo nga naay libre dire nga mohatag ninyo ug education plus mga tambal ug unsa pa dira nga gihatag sa gobyerno. Tanan ni libre. Gusto namo nga tanan mama mahatagan ug sakto nga serbisyo medikal ug ekonomikal. Hinumdomi nga ang gobyerno anaa para mag-alagad kaninyo,” padayong pagdasig sa asawa ni Gob AGR.

Ang Serbisyo Caravan nga gihatod alang sa barangays Igangon, Sawata, Sabangan, Sto. Niño ug Kipalili hangtod pa Byernes, Oktubre 12.


 

More Davnor Updates at

DavNor Karon

 

DavNor News