MAPASALAMATON gayod ang barangay Igangon nga gidala ang BEST PEOPLE Serbisyo Caravan sa ilang lugar apan ang taga silingang barangay Kipalili ilabina ang Sawata nagmahay kay wala sila pahibaloa.

Niadto pang Lunes, Oktubre 8 gibuksan ang Serbisyo Caravan alang sa barangays Igangon, Sabangan, Sawata, Kipalili ug Sto. Nino didto sa Igangon Integrated School.

“Oy wa gyoy barangay Sawata. Tinuod man seguro tong akoang na-monitor nga ginapugngan didto. Pero sige lang ilaha man pod nang desisyon. Aw daghan ang barangay Igangon kay host gud,” pasiaw ni Igangon Kapitan Jesse Alcomendras nga sama ug nag roll-call sa pila lamang ka opisyales ug barangay functionaries gikan sa laing upat ka barangays.

“Kami nagpasalamat sa atoang probinsya nga ang serbisyo nga para unta among adtoon gidala na dire. Mohangyo lang ko ninyo Sawata, Sto. Niño, Sabangan ug Kipalili nga kadtong wala kahibalo pahibaw-a ninyo kay naa pa’y upat ka adlaw. Sayang kaayo ang pagsuporta sa atong pinalanggang gobernador unya way moanhi dinhi. Kalimti lang una ninyo nang pamolitika,” awhag ni Kapitan Alcomendras ilabina ngadto sa dunay mga kaila sa nahisgotang upat ka barangays atol sa pagbukas.

Si Mrs. Alma Fe Cayubit, 47 anyos taga Igangon todo pasalamat kay nagbalhin-balhin sa mga serbisyo.

“Daghan kaayong serbisyo nga akong na-avail. Pagpa pap-smear, about sa mga kadtong bukol-bukol, daghan silang gipanghatag, mga lugaw, mga anti-biotic, anti-rabies sa iro, sa mga iring, semilya para pangtanom sa mga garden, mga vitamins, mga tambal, daghan kaayong gipanghatag. Daghan kaayong maayohon ilang gipanghatag. . Daghan, daghan kaayong salamat ni Governor nga iyang gidala dire sa among barangay ang iyang pagkamaayo, iyang pagkabuotan, daghan kaayo naka-avail,” pasalamat ni Alma.

Si Brenda Samson nga taga Igangon daghan sab nakuha nga mga serbisyo.

“Mag-pagupit aron mabag-o ang hitsura sa buhok. . Nagpasalamat ko’g dako kay dili lang kini nga service ang akong nakuha naka-kuan pod ko sa PSA, mas nakabarato ko ba. Nagpasalamat mi’g dako nga naabot ni nga serbisyo. Unta mausab pa. . Salamat kaayo gob,” matod ni Brenda nga naglaom pa sa sunod nga Serbisyo Caravan.

Gikan pa sa pagsugod niadtong Pebrero, aktibo na si PO1 Aldrin Basco ug mapasalamaton sa pribilehiyo nga nakaapil sa Serbisyo Caravan dili lang ingong polis apan usa sab ka barbero. 

“So far ang atong kapolisan walay gipili naa gyod ta’y participation. Mosalmot ta sa atong activities diha sa atong palibot aron makita pod sa atong katawhan nga ang atong kapolisan naa gyod nagserbisyo. Wala gyod ta ingong napugos kay pag-panerbisyo man ning atoa,” komento ni PO1 Basco samtang naggupit.

Apan kung mapasalamaton ang taga Igangon, si Mrs Indaya nga taga Sawata uban ang taga Kipalili nga dili gusto magpaila nagmahay nga wala sila pahibaloa.

“Ako ma’y nangursunada’g anhi. . sakay gani ko’g van. Alangan nga wa man gipahibalo. Nakapahibalo nako kagahapon kay naa ko sa tindahan namo nangabri ko akong pag-umangkon niadto kay nakaanhi daw siya adtong Lunes. Kagahapon ra pod siya nakaingon sa hapon. Magkuan gani ko’g Philhealth unta, magpa check-up sa mata,” matod ni “Indaya” nga nanghinayang sanglit pagka Byernes na sab mobalik ang serbisyo sa Philhealth.

Gawas nga nasayangan, nagmahay si Indaya.

“Niana gani ko ngano man nga di makasulod nga daan man sa una. .Bantay sila di na lang unta iapil-apil nila ang pang-goberno,” pagmahay ni “Indaya” sa iyang lokal opisyales sanglit naapektohan pag-ayo sila. 

Tumong sab sa BEST PEOPLE Serbisyo Caravan ni Gobernador Anthony del Rosario nga mahimong legal ang pagpuyo sa mga magtiayon pinaagi sa libreng Kasalan ng Bayan aron libreng makadawat ug benepisyo gikan sa gobyerno apan ikasubo nga tungod sa “pagpugong” ug sa dili pagsuportar sa mga opisyales sa lungsod walay libreng Kasalan ng Bayan nga mahitabo.

DavNor News