SERBISYO SOSYAL, pinansyal ug bisan moral nga suporta ang gitunol sa probinsyal nga panggamhanan sa 80,000 ka mga Senior Citizens sa tibuok Davao del Norte ingong pag-ila sa ilang kontribusyon sa katilingban panahon sa ilang produktibong tuig sa panerbisyo.

Ang letrang “O” sa BEST PEOPLE development agenda ni Gobernador Anthony del Rosario nagkahulogan ug “Optimum Health and Social Services” alang sa tanang Dabaonon lakip ang mga Senior Citizens. Gawas sa makanunayong pagpaluyo sa ilang kalihokan, gigahinan gayod ug semana matag tuig pinaagi sa nagkalain-laing serbisyo sa panglawas, paugnat sa kusog, moral ug ilabina ang pinansyal nga suporta ngadto sa mga tigulang.  

“We are very happy especially ang atong mga federation presidents sa nagkadaiyang lungsod ug syudad. Very happy kay ang suportar ni governor ug sa DSWD naabot gyod sa amo in terms of financial and moral support ug mga projects. Moral support in such a way nga kanunay sila nagasubaybay, unya every now and then nagahatag sila ug lecture sa ato ug mao na ang Senior Citizens happy gyod kaayo,” pagbutyag ni Mr. Alfredo E. Amores, presidente sa Davao del Norte Federation of Senior Citizens Association (DNFESCA) atol sa pagtapos sa ika-23 Provincial Elderly Filipino Week celebration didto sa RDR Gym, Byernes, Oktubre 12.   

“Whatever nga mga proyekto o kaayohan sa mga senior citizens not only in IGACOS, not only in Tagum but particularly all over the province of Davao del Norte suportado gyod mi nila ilabina ang atong DSWD. So far we have almost 80,000 strong members,” padayong pahayag sa presidente sa DNFESCA.

Gitunol sab sa administrasyon ni Gob AGR ang dihadihang tabang pinaagi sa opisina sa Provincial Social Welfare panahon sa kamatayon gawas pa sa pensyon sosyal.  

“Ang ato pod diay nga mga social pensioners daghan na gyod kaayo kay duna ta’y 80,000 senior citizens nga nagadawat ug pension. . Moabot ang panahon siya mamatay ang atong province nagatabang. Ang matag LGU nagatabang ug tag 3,000 pesos every senior citizen nga mamatay ug sa ato po’ng association duna po’y 5,000. Every time ang atong senior citizen mamatay naa gyod dayon instant nga tabang pinansyal ug moral support,” padayong esplikar ni DNFESCA presidente Amores.  

Ang kasaulogan nagdala sa tema “Kilalanin at Parangalan: Tagasulong ng Karapatan ng Nakakatanda tungo sa Lipunang Mapagkalinga.”

Ang usa ka semanang kalihokan gigahin alang sa mga Senior Citizens nag-apil sa mga padula ingon man presentasyon sa abilidad sa pagsayaw ug pagkanta sa mga contestants nga bisan kung dili makadaog pulos adunay madawat nga premyo. Ang probinsyal nga panggamhanan nagtagana ug sobra 85,000 para lang sa ilang cash prizes gawas sa tropeyo ug mga plake.

DavNor News