UPAT ka probinsya ang nagpadala sa ilang delegasyon sa Davao del Norte aron mag-training sa Community-Based Road Management Contracting (CBRMC) ingon nga usa ka kinahanglanon (requirement) una pa makadawat ug pondo gikan sa Conditional Matching Grant to Provinces (CGMP) gikan sa Department of Interior Local Government (DILG) aron sa pag-repair, pag-rehab ug pag-improve sa probinsyal nga mga karsada.   

Kahinumdoman nga ang DavNor nahimong Galing Pook Awardee 2017 tungod sa CBRMC -- pagpaapil sa mga organisasyon sa mga mag-uuma, mga drayber, o ubang rehistrado nga kapunongan -- aron mentinahon ang karsada ilabina ang pag-monitor ug pagtabon sa mga lubak.Nakadawat sab kini ug pasidungog niadtong Marso 2017 gikan sa RPMC XI hinungdan nga gisuportahan kini sa Australian Aid for International Development (AusAID) pinaagi sa Provincial Road Maintenance Facility kun PRMF.  

Katuyoan gayod sa BEST PEOPLE development agenda ni Gobernador Anthony del Rosario nga matabangan ang katawhang Dabaonon nga adunay dugang kita sa pagtubag sa ilang panginahanglan pinaagi sa pagpalig-on sa mga People’s Organizations ug mga asosasyon nga mahimong maka-sustenir ug makabarog nga lig-on.

“Our technical people from Davao del Norte, kadtong engineering natin was identified by the PMO to be the resource persons for this event. That’s why they conducted the training right here, dito sa bakuran natin because of the strong support of the provincial governor. It is the provincial government who has technical people, equipped how the program is being implemented,” pahayag ni DILG probinsyal director Abito Bernasor nga nagklaro nga ang DILG central office gayod ang nagpili sa DavNor.

“Unexpected namo dire i-held ang training pero sa tibuok Pilipinas, kita man lang gud ang nag-praktis sa CBRMC. Mao na karon nia ang upat ka probinsya nag-participate sa atoang training-workshop. Ang Central Office sa DILG maoy naga-coordinate sa atoa, sila mismo ang nagpili,” pasabot sab ni DavNor Provincial Engineer Raul Mabanglo nga nagpahibalo nga bisitahon sa mga partisipante ang Florida-Sua-on Jct-Gupitan provincial road karong Huwebes, Oktubre 18.   

Sa karon ang Davao del Norte adunay 839.96 kilometros probinsyal nga karsada ug motaas pa ngadto sa 852.9 sunod tuig. 440 kilometros ang gi-mentinar sa CBRMC samtang ang uban pinaagi sa administrasyon. Ang plano gilatid na sab alang sa tuig 2019 sa tumong nga kab-oton ang 80%.

Dugang gipasabot sa probinsyal enhinyero nga ang CBRMC nga pamaagi nakahatag ug trabaho, ang mga residente mibati ug “ownership” sanglit ang mga karsada nga gi-mentinar sila ra sab ang pangunang mogamit. Dugang pa, ang dako nga kaayohan sa maayong pagka-mentinar naghatag ug kasayon sa mga mag-uuma sa paghakot ug pagbaligya sa ilang mga produkto ug ilabina sa mga estudyante sa pagngadto-nganhi sa eskwelahan.

Aduna pa’y ikaduhang batch nga magbansay dinhi sa DavNor sa bulan sa Nobyembre. 

DavNor News