GIPILI sa National Commission on Culture and Arts (NCCA) ang Davao del Norte nga isa sa pinakaunang probinsya kauban ang Davao City diin gilusad ang proyektong “DINEHEY” uban ang pondo nga P5 milyones.    

Ang DINEHEY nga gikan sa pinulongan Aramanon-Manobo nagkahulogan ug “coming together,” mag-uban o magtagbo. Nga gipuy-an sa daghang tribo nga dunay lain-laing pinulongan, gipahaom kini sa probinsya pinaagi sa pagtawag nga “Dalit Ambit sa Kaliwatan, Panagtagbo sa DavNor.”

“We’re very thankful for the NCCA for bringing in Davao del Norte for the first time the project DINEHEY. Importante mapatunhay nato ang kultura dinhi sa Davao del Norte kay matod pa nila if you do not know your culture maglisod gyod ka molambo sa imohang kinabuhi. We have to ensure nga ang kultura sa atong mga lolo dapat makahibalo ta so we can continue allocation of government funding. I’m proud at least ako nakahibalo kung asa ko gikan. And you should also know kung asa mo gikan,” matod ni Gobernador Anthony del Rosario sa paglusad sa DINEHEY niadtong Byernes nga nagpaila sa iyang kagikan nga Mandaya uban ang pag-awhag nga dili ikaulaw ang kagikan nga Lumad.

“Pioneering implementors are the provinces of two Davaos, the city and DavNor. We are really, really happy and very proud nga dinhi gyod nagsugod kay para gwapo gyod ba, naa gyo’y ‘bench;’ mag-benchmark gyod ang mga kuan kung unsay buhaton sa DavNor, kay kabalo gyod ta unsay kapabilidad sa DavNor,” pagpatin-aw ni Ms. Zayda Macarambon, Project DINEHEY Mindanao TWC atol sa programang Kapihan sa Kapitolyo nganong dinhi gibutang sa probinsya.

Katuyoan sa DINEHEY nga ipahinumdum-balik ang kultura ug kagikan nga magpasibaw sa kulturang Dabaonon ilabina ang natad sa arte.

Sa DavNor dunay pito ka grupo sa Ata-Manobo, Dibabawon, Mansaka, Mandaya, Mangguangan, Kagan ug Sama nga nagsulti ug lainlaing pinulongan.

“Why in Davao del Norte kay nakita sa NCCA nga nag-put up ta ug mga exhibits last Kadagayaan Festival ug ilabina sa pagdawat ug pagtugot ni Governor,” dugang pagklaro ni DavNor Provincial Tourism Officer Noel Daquioag.

Kay ang kultura mahimong behikulo para sa mapinadayonon, panaghiusa ug kalinaw, langkit sa proyektong DINEHEY ang Department of Education (DepEd) aron kini makat-onan sa mga estudyante diha sa subject nga Special Program on Arts (SPA).

Tahas sa NCCA nga ipakaylap ug magtapo ang managlahing kultura bisan pa sa lain-laing tribo sa Mindanao sanglit daghan niini adunay panagsama.

Ang Project DINEHEY adunay lima ka components: Tanud Mindanao nga mao ang pagbutang ug mga marka o ilhanan sa kultura, kagikan ug mga panglantaw alang sa panaghiusa ug kalinaw; Alampat Karaban alang sa Kalinaw nga nagpakita sa kanhi nga mga arte; Traditional, Cultural and Contemporary Expressions nga magpakita sa lainlaing grupo sa mga artista sa Mindanao sama ni Joey Ayala, Bayang Barios, Maan Chua ug Waway Saway; Handuraw Mindanaw nga pagpakita sa lain-laing arte, panapton ug tradisyonal nga mga kasuotan ingon man mga kabilin nga i-displey sa DavNor Capitol Grounds ug Robinson’s Place Tagum City; ug ang “Kaan Ta” nga magpakita sa lain-laing arte sa pagluto  base sa lainlaing kultura.

DavNor News