PADAYONG GIHATOD sa ikaduhang adlaw sa BEST PEOPLE Festival of Services ang way pili nga pag-alagad lakip na ang “from womb to tomb” nga serbisyo ngadto sa duolan duha ka gatos nga mga buntis nga misis didto sa Maniki, Kapalong kagahapon, Oktubre 24.

“Karong adlawa dili lang pag-eksamin sa inyong ihi, pagpanghatag adtong vitamins, naa pod mga tips nga ihatag sa inyoha kung unsa gyo’y dapat himoon sa isa ka buntis. Kay dili baya lalim magbuntis, dili lalim pag-alaga ug buntis, daghan dapat himoon. Naa pod mo’y makutlo mga pahinumdom sa inyohang pagbuntis ug ipahibalo pod sa inyohang mga silingan kung unsay dapat himoon kung mabuntis na,” matod ni DavNor Provincial Health Officer II Dr. Alfredo Lacerona.

Ang Department of Health nga mao ang pangunang ahensya sa pag-atiman sa panglawas kanunay’ng nagpadala ug mga health personnel matag libot sa Serbisyo Caravan.   

“Ang tumong sa administrasyong Duterte nga ang pag-alaga sa isa ka tawo dapat manggikan gyod pagka buntis hangtod sa kamatayan. From womb to tomb ang pag-alaga sa isa ka tao. Ang isa ka buntis para makaingon nga de-kalidad ang serbisyo nga madawat dapat kaupat mobisita sa Health Center. Una sa first three months, ikaduha sa 4, 5, 6, nga trimester ug kaduha ka beses sa last trimester sa 7, 8, 9. Pagwala sa regla adto dayon sa center para sa prenatal. Walay rason nga dili mo kaadto sa health center sa first three months. Tanang barangay dire sa Kapalong aduna ta’y barangay health station. . naa ta’y midwife, naa ta’y NDP,” matod sa representante sa Department of Health Ms. Corazon Mendez ngadto sa mga buntis. 

Ingong usa ka nars ug presidente sa DavNor Provincial Council of Women, kanunay nga presente sa mga Buntis Congress si Ms. Aina Chiu del Rosario, ang asawa ni Gobernador Anthony del Rosario, aron dasigon ilabina ang mga “first timer” nga buntis.        

“A mother’s job is the hardest job out there. It is a never ending job. However it is one of the most fulfilling occupation. Ikaw nagsakripisyo pagkakaron, pagdako sa imong anak makapasa ug CPA, mahimong lawyer, it is the pride of the family and syempre sa inahan grabe atong kalipay, di ba? So ang kasingkasing sa usa ka inahan pirme gyod unahon ang uban,” matod ni Ms. Aina del Rosario.

Gidayeg sab sa asawa sa gobernador ang pagtambong sa mga buntis timaan sa ilang pagka-responsable dili lang para sa umaabot nga anak apil na ang para sa kaugalingon.

“Dili namo kailangan mag-adto sa doktor magbayad. Kani siya libreng serbisyo para sa inyoha. Gusto namo nga tanan mama mahatagan ug sakto nga serbisyo medikal ug ekonomikal. Dili babag ang kalay-on sa gipuy-an ug estado sa kinabuhi sa pagdawat sa serbisyo. Hinumdomi nga ang gobyerno anaa para mag-alagad kaninyo. I can confidently say that the province will give importance of services that push for growth and development that will create a positive environment for the mothers and children of our province,” padayong pahayag ni Ms del Rosario.

Ang tanang buntis makadawat gikan sa prenatal ug hangtod na sa post-partum nga mga serbisyo.

DavNor News