Serbisyo LTO gipahimuslan sa 200 Kapalong drayber way-lisensya

SOBRA DUHA KA GATOS way lisensyang drayber nga taga Kapalong ang nakapahimulos sa serbisyo sa Land Transportation Office (Tagum City) dala sa BEST PEOPLE Festival of Services ni Gobernador Anthony del Rosario niadtong Lunes ug Martes (Oktubre 22, 23).

Katuyoan gayod sa gobernador nga ipaduol ang halos usa ka gatos nga serbisyo gikan sa DavNor Kapitolyo ug ubang nasyonal nga ahensya ngadto sa katawhan aron sila makadaginot ug panahon, kusog ug ilabina kwarta.

Ug bisan kung ‘priority number’ lang una ang gihatag aron sila makakuha ug Student Permit (SP) ug license renewal apan gikalipay na sa mga drayber kay dili na sila malangan pag-abot sa LTO Tagum.

“Dakong pasalamat nga miabot ning programaha dire kay maka-process mi nga di na mo-adto’g LTO,” matod sa 26-anyos nga si Levi Abella nga taga Maniki ug pito na ka tuig nag-drayb nga way lisensya.

Upat ka bulan na sab nag-drayb si Rodman Recto, 22-anyos, nga taga Villa Clementa uban ang kahadlok nga way lisensya.

“Naa gyo’y kahadlok pero pasalamat ko karon nga makakuha ko ug SP, maka-less ta padulong sa lisensya. . . Dako akong pasalamat namugna ning programaha,” mapahiyomon si Rodman nga naggunit sa priority number.

Si Tommy Ramos nga 48 anyos ug nag-drayb ug side car, tulo na ka tuig expired ang lisensya.

“Na-expire tungod lagi usahay ma-short ta sa panalapi. . Pasalamat ko kang Gob nga ang serbisyo sa probinsya iyang gipaduol dire sa amoa kay dili na mi mahasol unya dakong save sa among kwarta. Libre pa medikal, naa pa’y libreng lugaw kun gutomon ka, way problema. Salamat kay AGR, suportaran nato siya kay dako siya’g gikatabang sa masa,” matod ni Tommy nga nang-awhag sa mga kaubanang nagkuha ug SP.

Si Marissa Segatsuka, 31 anyos nga taga Maniki gustong makakuha sab ug SP kay kanunay mang-extra ug drayb sa motorsiklo.

“Nalipay gyod ko. Unya ang ako lang gika-problemahan kay NSO gyod nga birth ang gikinahanglan. Ako pa man gi-request unya wala pa nag-abot. Marriage nako maoy naabot na. Ako ganing hangyoon. Nagpasalamat gani ko kay ka-avail sa services. Salamat kaayo ila ni Gob nga nakuan nila ni dire unya daghan pod naka-avail ani,” matod ni Marissa.

Tungod sa limitado nga mga personahe, nalimitahan sab ang serbisyo sa taga LTO Tagum sanglit nagkinahanglan ug mga ekipo ilabina ang pag-rehistro sa mga sakyanan apan gikalipay gihapon ilabina sa hilit nga mga lugar nga naabtan sa BEST PEOPLE Festival of Services.


 

More Davnor Updates at

DavNor Karon

 

DavNor News