BISAN kung gibabagan, gihadlok nga mawad-an ug benepisyo, apan gibahaan hinuon sa liboan ka tawo ang Serbisyo Caravan hatod sa BEST PEOPLE Festival of Services ni Gobernador Anthony del Rosario (AGR) didto sa Maniki Central Elementary School sa Kapalong gikan Lunes hangtod Byernes (Oktubre 22-26).

Hangtod alas 2:16 hapon sa Byernes, miabot na ug 6,891 ka tawo ang nakadawat ug lain-laing serbisyo gawas pa sa mga “first-timer” nga mianha lampas alas 2 sa hapon aron maserbisyohan.

Nanghinayang gyod si Gobernador AGR tungod sa pagpugong ug panghadlok hinungdan nga daghan ang nagduhaduha ug wala moadto sa libreng serbisyo.

“Usa man lang ang gusto nako para sa atong probinsya sa Davao del Norte. Gusto ko’g panaghiusa, gusto nako’g kalinaw alang sa kalamboan natong tanan. Mao ra man na atong tuyo sa panerbisyo. Unya ako na gani ang pinakataas nga opisyal dinhi sa Davao del Norte, ako na gani ang gobernador, ako na gani ang gipili nga amahan sa probinsya, gibawalan nako mag-anhi dinhi. Kay dili man ko imbitahon dinhi sa Kapalong, sa inyohang mayor. Mao pod na didto sa San Isidro,” panghinayang sa gobernador nga dili dali mapaabot ang mga serbisyo sa probinsya tungod sa “sayo nga pamolitika.”

“Didto sa barangay Igangon sa San Isidro gamay lang miadto didto tungod kay gipakatag sa mayor didto nga pag ang 4Ps motambong, modawat ug serbisyo gikan sa probinsya, ilahang tanggalon sa 4Ps. Mao nang 4Ps sa San isidro nahadlok kaya wala nitambong kay syempre nahadlok pod na sila nga mawad-an ug benepisyo. Para lang mahibaloan ninyo kanang program sa 4Ps dili na siya programa sa mayor, programa sa governor, dili pod na siya programa sa congressman, programa na sa atong mahal nga presidente Digong Duterte. Gipaagi na siya sa Social Welfare. . Dapat dili gamiton sa pamolitika,” pagpadayag ni Gob AGR sa panghadlok nga nahitabo didto sa San Isidro.

Hinuon giangkon sa gobernador nga wala siya’y mahimo sanglit dili siya ang mayor sa maong lungsod.

“Wala ta mahimo kay siya man ang mayor. Pero ang pinakadakong problema ang serbisyo gikan sa gobyerno. Ako’y nalipay nga bisan pa dili ko makasulod dinhi at least kamo nakadawat sa serbisyo sa probinsya kay sa tinuod lang dili man importante nga ang governor maka-anhi diri, ang importante ang serbisyo makaanhi dire para makatabang kaninyong tanan dinhi sa Kapalong,” padayong pasabot ni ‘Gob AGR.

Maklaro gayod nga adunay “presyur” sanglit walay barangay opisyales sa Luna, Mamacao, Sampao ug  Pag-asa nga midawat sa “Plaque of Appreciation” nga gihatag sa Davao del Norte.

“Wa mo nakapansin ganiha? Nagpasalamat na gani mi sa kapitan sa Luna, Mamacao, Sampao, Pag-asa pero wala sila nitambong dinhi. Ngano man? Kabalo mo ngano man? Kay kung pakita na sila dinhi, segurado unyang hapon tawagon na pod na sila sa mayor, kasab-an nganong patambong-tambong ka diha sa programa sa gobernador. Mao na mahitabo. Kaya bisan ang kapitan mahadlok pod kay masuko man daw si Mayor kung magpakita sila nga kauban nato. Ilabina kung magpa-picture pa. Ana gyod na dinhi sa Kapalong ug San Isidro,” panghinayang sa gobernador sa probinsya.

Ang lima ka barangays sa Maniki, Luna, Sampao, Mamacao ug Pag-asa mao ang pangunang tumong nga maserbisyohan apan wala sab balibari ang mga gikan sa barangays Mamangan, Santiago, New Loon, Kalian ug Kamuning sa Serbisyo Caravan gikan Lunes hangtod Byernes.

Sa closing program Byernes, gipaneguro ni Gobernador Anthony del Rosario nga mahatagan ug 200 ka lingkoranan, 50 ka mesa, multi-purpose stage, bleachers, lights, sound system ug generator alang sa DepEd Kapalong district karong 2019 gawas pa sa pagpanghatag ug mga bags ug school supplies sa mga Day Care ug Grade I nga mga pupils.

DavNor News