ALANG sa mga empleyado sa Provincial Information Communication, Knowledge Management Office (PICKMO) dugang kahanas ug kinitaan apan alang sa mga residente sa Women Development Center (WDC), preskong kahibalo ang pagpailawom sa “Pastry Production” training, Lunes, Oktubre 29.

Ang ikatulong “E” sa BEST PEOPLE development agenda ni Gobernador Anthony del Rosario nga nagkahulogan ug Employment and Livelihood Opportunities kanunay gayod nagpahigayon ug mga pagbansay aron makabaton ug dugang kahanas ang mga Dabaonon apil ang mga empleyado.

Ang paghimo ug cake ingon man cookies ang gitudlo sa mga empleyado sa PICKMO, staff ug residente sa WDC pinaagi sa pakig-alayon sa Davao del Norte Workforce Development Division (EWDD).

“Unique kaayo ni nga activity. Atong pasalamatan ang GAD focal sa PICKMO kay (dili) lang within office compliant focus, naay Women Development Center gi-mix. Naay tulo ka sphere ang GAD: productive, reproductive ug social,” pasabot ni DavNor Employment Workforce Development Division facilitator Maritess Racacho labot sa pag-apil sa mga staff ug sa napulo ka residente sa WDC.

Gipanghinaut ni Ms. Racacho ilabina sa mga residente sa WDC nga ang ilang makat-onan mahimong mapinadayonon nga panginabuhian kung gikinahanglan.

“Kini sa productive sphere aron makakat-on mo unya puhon basin mahimo ninyo ni nga pangabuhian, makadugang income ninyo. Kinsa’y gusto makakwarta diria. Mao ni ang ‘ties’ sa work nato aron makakwarta ta. Upat atong himoon karong adlawa. I hope kining upat naa ta’y mapadayon. Ug dili man kining upat, nanghinaut ko naay mapadayon nga dili lang ni personal consumption kundili panginabuhian gyod,” pagdasig ni Ms. Racacho nga nag-share pa ug kaagi sa usa ka tawo nga nagmalampuson pinaagi lang sa pagluto-luto.

Ang GAD focal person sa PICKMO nga si Ms. Charlene Luna ug Ms. Gerne Boja ang nanguna aron mapahigayon ang usa ka adlaw nga training dili lamang sa mga empleyado lakip na ang WDC.

DavNor News