3rd Tipanud gipahigayon sa mga DavNor IPs

SA IKATULONG tuig, gipahinabo sa nagkahiusang tribo (Indigenous People) sa Davao del Norte nga Dibabawon, Mandaya, Mangguangan, Manobo, Mansaka, Kalagan ug Sama ang 3rd Tipanud Festival, Oktubre 30 ug 31.

Nga may tema “Ipadayon ang kalig-on sa pagkab-ot sa kalinaw, kalamboan, pagrespeto ug panaghiusa,” mapasalamaton gayod si Davao del Norte IP Representative Board Member Datu Marcial Lig-onan kay ang mapinadayonon tinuig nga kalihokan magtabang nga mapreserbar ang tradisyon ug kultura sa matag tribo.

“Ang ‘Tipanud’ nagkahiusa ang pito ka tribo sa Davao del Norte pagselebrar sa kalihokan, panagtigum sa tribo. . aron mapreserbar ang kultura sa umaabot nga kaliwatan o generasyon. Dako mi’g pasalamat nga gitagaan ni Governor AGR ug kinabuhi ning among festival dili lang pagselebrar kundili mapreserba diha sa kabataan nga madasig sila pinaagi sa kultura nga mao ang IPS, Indigenous People Political Structure of Culture,” dayag pasalamat ni Board Member Lig-onan kang Gobernador Anthony del Rosario..

Apan luyo sa paningkamot sa hamtong nga mga sakop sa tribo, namatikdan nga ang mga “IP millenials” gamay na lang ang nasayran samga tradisyon ug kultura ug kadaghanan kanila dili na makamao mosulti sa ilang pinulongan.

“Mao na karon among gipaningkamotan sa Davao del Norte nga mobalik na pod mi sa School for Living Traditions para tudloan na pod ang mga kabataan sa kultura. Maulaw sila mag-linumad, . .  ngadto kang governor mangayo na pod mi ug School for Living Traditions nga tudloan na pod kay ug di i-preserbar ang kultura, mawala ang tribo kay wala na ma’y makasaysay kun mangatigulang na,” dugang pahayag ni BM Lig-onan.

Ang IP representative sa Barangay Kamuning, Asuncion nga si Lorenda Matao Corpuz sa nag-awhag sa mga ginikanang IP nga tabangan ang ilang mga anak pinaagi sa pagtudlo labot sa ilang tribo.

“Sa amoang gobernador, Sir AGR thank you kaayo, salamat kaayo nga kani nagpadayon, ug unta kini hangtod sa hangtod aron ang among kabataan makatuon pod ug makapadayon sila ug tuon sa ilang kultura. Giawhag nako ang mga ginikanan nga unta ang atong mga kabataaan ipasulti pod sa ilaha, nga pa-estudyohan pod sa ilaha ang Lumadnon nga tribo, lumadnon nga dula ug lumadnon nga pamatasan,” awhag ni IPMR Lorenda.

Hinuon dili tanan sa mga IP millenials nga maulaw mailhan nga sakop ug minoridad

“Dili jud ko maulaw kay mao na ang among tribo kinahanglan atong ipagawas kung unsa ta, makita sa tanan kung unsa gyod ang tribo,” matod ni Vanessa Samonte nga sakop sa tribong Ata-Manobo sa Asuncion.   

“Di nako ikaulaw. Ipagmalaki jud nako nga Mandaya ko kay mao jud ni akong tribo, mao jud ni akong gidak-an,” garbo nga mipadayag si Mary Joy Gutierrez bisan kung gi-angkon niya nga maglisod na siya ug sulti sa ilang pinulongan.

Proud sab ang 18-anyos nga si Marvin Samonte nga sakop sa tribong Mandaya.

“200 percent dili nako ikaulaw akong tribo, proud ko,” mubong pahayag ni Marvin nga nagtungha didto sa Davao City.

Gawas sa mga padula sa tribo, ang 3rd Tipanud gitiman-an ug mga Lumadnong presentasyon sa sayaw, balak ug mga kanta nga naggamit sa ilang Lumadnong instrumento.


 

More Davnor Updates at

DavNor Karon

 

DavNor News